Geert Wildersimut illuatungiliuttut filimiliorniartut

Suliniaqatigiiffiup filmi piviusulersaarut taaguutilik ”Fitna illuatungilerlugu” suliarileruttorpaa, filmimilu Biibilimi nakuusernerit filmiliariniarneqartut, aviisi Kristeligt Dagblad allaaserinnippoq.

Filmimi ”Fitna illuatungilerlugu”-mi takutinniarneqarput, oqaluussisartut Biibilip aqqani nakuusernissamik kajumissaarisut aamma kristumiut Biibilip aqqani pinerluuteqartut pillugit assilisat. Iranimiut nutaarsiassaqartitsiviannit Fars-imit oqaatigineqarpoq, nunarsuarput tamakkerlugu kristumiut nakuusernissamik, saassussinissamik, arnanik meeqqanillu ikuallaanissamik inuiannillu toqoraanissamik ”kajumissaarinerit” filmimi sammineqarniarput.

Iranimiut nutaarsiassaqartitsiviat naapertorlugu Biibili maanna atorneqartoq siornatigut Biibiliusumit ilumoortumit killormut saatitaavoq ilumoortuunanilu, taamaattuminngooruna juutit kristumiullu ullumikkut iluamik uppissuseqanngitsut.

Iranimiut piviusulersaarummik filmiliariniagaat qaqugu saqqummersinneqassanersoq suli ullulerneqanngilaq.