Geert Wilders mianersorfigisariaqarpoq
Geert Wilders Koranimut sakkortuumik isornartorsiuisumik videuliornissamik pilersaaruteqarpoq. Geert Wildersip nersualaarinninnera ministeriunerup Anders Fogh Rasmussenip isornartorsiorlugu akissuteqarfigereerpaa, taamatuttaaq Wildersip politikkikkut isumaanut Danmarki isumaqataanngitsoq nunanut allanut ministerip Per Stig Møllerip ullumi oqaatigeqqippaa.
- Wildersip pissusaa iluaqutaasutut oqaatigineqarsinnaanngilaq, akerlianilli ingasaassiniarnermik kinguneqaannartarluni. Ingasaassiniartummi taamatut atorluaaniartarnerat paaseqatigiinnissamut iluaqutaangaarnavianngilaq.
Assigiinngitsunik upperisallit ataqqeqatigiillutik inooqatigiinnissaat ingerlariaqqinnissamut tunngaviusoq danskit nalakkersuisuisa sapaatip akunneri pingasut kingulliit ingerlanerini upperisarsiortut musliimit akornanni oqaatiginiartarpaat. Immitsinnut puffassarnata isummatta assigiinngissussaannut ataqqinnissinnaassuseqarnissaq sungiunniartariaqarparput, Per Stig Møller oqarpoq.
