QULAARPAA GE: Sanaartorneq pitsaanerusumik pilersaarusiorneqartariaqarpoq

Suliffeqarfiit ilinniartussaminnik tigoqqaanerussappata nutaanik sanaartornermi nutarterinermilu suliaqarnermi namminersorlutik oqartussat kommunillu pilersaarusiorluarnerusariaqarput, ukiut tamarluinnarmik inuussutissarsiutinik ilinniarfinnut inuusuttorpassuit iluatsinngitsoortumik qinnuteqartaraluarnerat pillugu oqallinnermi GE-mi pisortap oqaatigaa.
Assi © : Jørgen Chemnitz
marsip 31-at 2016 06:11
Nutserisoq Connie Fontain

- Kisitsimmi nikerarput, sumiiffinni piffissap ilaanni assigiinngitsuni suliassat amerlasarput ilaannilu ikittarlutik, GE-mi pisortaq Brian Buus Pedersen oqarpoq.

GE-mi suliffeqarfiit ilaasortaasut 500-ut missaaniittut inuusuttunut inuussutissarsiutinik ilinniarusuttunik ilinniarfissaqartitsissagunik, namminersorlutik oqartussat kommunillu sanaartugassanut suliassanullu tunngasunik pilersaarusiornermut pikkorinnerusariaqartut, Brian Buus Pedersen isumaqarpoq. 

- Kingullertigut takuarput sanaartugassanik illuliassannillu suliassaqarluartoq, tamannalu GE-miit soorunami nuannaarutigeqaarput, piffissallu ilarujussuani suliassaaleqisarneq iluaqutaaneq ajorpoq.

Aamma atuaruk Imarsiortunngorniat ilinniarnertik aallulluarpaat

Piffissap ilarujussuani suliassaaleqisarneq peqqutaalluni suliffeqarfiit ilinniartussaminnik noqqaanissartik mianersuutigisaraat, Brian Buus Pedersen oqarpoq.

- Suliakkiissutinik allattugaatiminni suliassat taamaallaat qaammatinut pingasut, arfinilinnut, qulinngiluanullu suliassaqarumaartoq takugaangamikku ilinniartussanik nutaanik tigusinissartik mianersuutilertarpaat.

Ilinnialerusuttullu oqaatsisigut piginnaasakinnerat aamma pillugu suliffeqarfiit tiguserusunneq ajortut, Brian Buus Pedersen oqarpoq.

Aamma atuaruk Inuusuttut praktikkerfissaaruttut ilinnialinngitsoortarput

- Qinnuteqartup qallunaatoorsinnaannginnini tuluttoorsinnaannginninilu pillugit suliffeqarfimmi peqataasinnaanera killeqarsinnaammat, misilittakkallu malillugit tamanna pillugu ilinnialersut ullut 14-iniinnaat qaangiuttut tunniutiinnartarmata qinnuteqartoqaraangat tamakku immikkut isiginiarneqartarput. Tamannalu ajornartorsiut qaangerneqassappat politikkikkut iliuuseqartoqartariaqarpoq, Brian Buus Pedersen oqarpoq.

Brian Buus Pedersenip isornartorsiuinera politikerinit qanoq oqaaseqarfigineqarnersoq Qulaarpaami oqallitsitsinermi unnugu aallakaatinneqartussami tusarnaarsinnaavat.

Aamma atuaruk 1 procentiinnaat inuussutissarsiornerup iluani ilinnialertarput