GE-p Siumut isumaqatigigaa
Akuersissuteqartarnerit kinguaattoorneri aalisarnermi suliffissanik inuiaqatigiillu aningaasaataannik naleqartut GE-p oqaatigaa.
Akuersissutinik tunniussinissamut atatillugu paasissutissanik naammattunik pissarseqqaarluni aalajangiisarnissap GE-p paasilluarsinnaavaa, sulialli taakku qangali naammassineqareersimasussaagaluartut GE isumaqarpoq, Siumullu inatsisartuni ilaasortaatitaasa taamanikkut naalakkersuisunut isornartorsiuinerannut atatillugu allakkiaat innersuussutigalugu, tassami Siumukkut taamanikkut isornartorsiunermut atatillugu oqaramik sivisuallaamik aalajangiiniartoqarsimasoq, tamannalu suliffissanik isertitassanillu annaasaqaataasimasoq:
- Tamanna kingumut qiviarlugu ilinniarfigisariaqarparput, naatsorsuutigisariaqarpormi akuersissuteqartarneq naammassisaqarfiunerusumik aaqqissuunneqarsimagaluarpat, akuersissuteqartarneq aallartiaarnerusinnaasimagaluartoq taamaaliornikkullu aamma pisassiissutit tamakkerlugit pisarineqarsinnaasimassagaluarlutik. Pisimasut ilinniarfigisinnaasariaqarpavut, taamaaliornikkut pisassiinerit siusinnerusukkut pisalerlutik, misileraallutillu aalisartut sullissinissamut sulinissaminnut pitsaanerusunik atugassaqartillugit, Siumup inatsisartuni ilaasortaatitaasa taamanikkut naalakkersuisunik isornartorsiuinerminni ilaatigut allaaseraat.
GE Siumut ilaleraa
GE-llu Siumup inatsisartuni ilaasortaatitaasa isornartorsiuinerannut isumaqataanini tusagassiuutinut nalunaarummi maanna nalunaarutigaa, taamanikkullu pissutsinut assingusumik maannakkut inissisimasoqarneranik oqarlutik.
- Aalisarneq sunaluunniit pilersaarusiorluartariaqarpoq piareersarluartariaqarlunilu, minnerunngitsumik tamanna atuuppoq Atlantikup avannaani ikerinnarsiortunik aalisarnermi nutaajusumi Kalaallit Nunaanni suliniuteqarnissamut. Aalisarneq tamanna siunissamut pingaarutilerujussuanngorsinnaavoq, GE ilaatigut taama allaaserisaqarpoq.
Aamma atuaruk Avaleraasartoortassiinermi kalaallit salliutinneqartut