GBU: U-18 aqqutissaannik iluatsitsissuppagut

Kalaallit Nunaanni arsaattartut peqatigiiffiata angutit inuusuttut U-18-imik taallugu Maniitsumi pissartanngorniunnissaannut klubbit avataaneersut tallimat tamaasa aqqutissaannik ullumi iluatsitsissuppaat.

Narsami arsaattartut pissartanngorniunnernut annguttut aqqutissaannik ikiorsinnaanagit sungiusaasuat Vittus Poulsen GBU-mit ippassaq nalunaarfigineqaraluarpoq, ullumili tassa nuannaarutissaannik tusarlerneqarput, ulloqeqqanullu sinersortaammut ilaallutik aallarlutik.

GBU-p siulittaasua Lars Lundblad pisut pillugit ima nassuiaavoq.

- Tassa ataasinngormat bestyrelsemi tusaratsigu tamarmik piiarneqarsimasut, suliniutigisagut iluatsipput. Air Greenlandip Charteria aqqutigalugu avannaaneersut - Aasianneersut Ilulissaneersullu – timmisartumik, umiarsuarmik kujammukarsimasuugunik akigititap annertoqataanik akiliilluta, Maniitsuliarnissaat iluatsippoq. Narsameersut umiarsuarlutik aamma ullumi avannamut aallarput.

Timersortartut unammiartortut nalinginnaasumik angallassinermut atasumik angalasinnaaqqullugit, pissartanngorniunnernut annguttussaasorisat aqqi siumoortumik nalunaarutigineqartalissasut Lars Lundbladip ilanngullugu oqaatigaa.

- Arnat qanittukkut Sisimiunut unammiartortussaapput. Taamaattumik anngutissangatitatta aqqi nalunaarutigisariaqassavagut, Lars Lundblad nassuiaavoq.

-Umiarsuakkut angallanneq maannakkut ilungersunartorujussuuvoq, Arctic Umiaq Line allatut ingerlatsilermat. Nalinginnaasumik siumut inniminneriikkat ullut 14-it sioqqullugit aaneqanngikkaangata piiarneqartarput. Angalatitseqatigiiffiilli suleqatiginerulernerisigut neriuppunga aternik nalunaaruteqareertarnissarput iluaqutaassasoq, Lars Lundblad oqarpoq.

Maniitsumi angutit U-18-imik taasat unammersuarnissaat ataasinngorpat juulip ulluisa qulinganni aallartittussaavoq. Peqataassaapput Maniitsumit Kâgssagssuk, Ilulissanit Nagdlúnguaq, Aasiannit A-97, Nuummit GSS B-67-ilu kiisalu Narsamit N-85.