GBU: Suliat ilungersunarnerat tunuartoqartitsisarpoq

Isikkamik arsaattartut kattuffianni siulittaasup Lars Lundbladip siulersuisunit tunuartoqarnera uggoraa. Isikkamik arsaattartut Kattuffianni suliat ilungersunartarnerat siulersuisuni ilaasortat tunuartarnerannut pissutaasoraa.

Kalaallit Nunaanni Timersoqatigiit Kattuffiata nittartagaani allaqqasoqarpoq Lars Lundblad suleqatikkuminaatsuusoq, Lars Lundbladilli taama oqarneq paasisinnaanngilaa:

- Misilittagaqartorujussuuvunga, tamakkuninnga ukiuni amerlasuuni suliaqarnikuuvunga. Immaqa timersornermut atatillugu suliaqartuni nunatsinni sivisunerpaamik issiasut ilaagivaannga, taamaattumik tupaallaatigivara taama nalilerneqarnera. Sapinngisara naapertorlugu ajunngitsoq anguniarlugu suliaqartarpunga, oqarpoq.

Isikkamik arsaattartut kattuffianni siulittaasoq Lars Lundblad ima nangippoq:

- Meeqqat aasakkut fodboldskolertarnerat annaanniarlugu maannakkut ilungersorlunga suliaqarpunga. Taamaattumik tupaallaatigivara suleqatigineqarsinnaanngitsutut nalilerneqarnera.

Oqarpoq isikkamik arsaattartut kattuffiata sulianik annertuunik suliaqarnera peqqutaalluni isumaqatigiinngittoqartarsimasoq.

- Ilaanni assortuullutalu isumaqatigiinneq ajorpugut - suliagut annertoorujussuugamik. Kisianni maannakkut Kalaallit Nunaanni arsaattartut kattuffiat ineriartortorujussuummat suliassarujussuarnik suliaqartarpugut. Taamaattumik isumaqatigiinngissuteqartarpugut.

Annertunerusumik isumaliutigisimanngilaa suliassarpassuaqarnerput ilumut siulersuisuni ilaasortanik tunuartoqarneranik kinguneqarsinnaasoq.

- Oqaatigiinnarsinnaavara suliagut angisuut aporaaffeqartitsisarnerat pillugu maanna taama pisoqarmat.

Lars Lundblad ilanngullugu oqarpoq Isikkamik arsaattartut kattuffiata siulersuisuini Tønnes Berthelsen taarserlugu Ingemann Dorph ilaasortanngortoq

Isikkamik Arsaattartut Kattuffiat aappaagu Nuummi Aasianniluunniit atatsimeersuassaaq.