GBU pissartanngorniuunnernik nutaanik pilersitsisoq

Nunatsinni isikkamik arsaattartut klubbiisa 17-t, 19-t 21-llu ataallugit ukiullik ukiumi nutaamit pissartanngorniuutalernissaat qilanaarisinnaavaat. Tamatuma saniatigut meeqqat naligiiaarnerulerniassammata agguataarneqartarnerat aamma sukanneqassasut Kalaallit Nunaanni Arsaattartut kattuffiat, GBU, ilisimatitsivoq.
Allattoq Mads Pedersen
decembarip 29-at 2016 13:14

Manna tikillugu arsaattartut inuusuttut 18-nik ukioqaleraangamik inersimasunut nuuttarput. Tamannalu ajoraluartumik kingunerlussinnaasarsimavoq. 

Inuusuttummi inersimasunut nuukkaangamik pissartanngorniuunnerni peqataasinnaanerat ajornarsinnaasarpoq sungiussisimanerit toqqarneqakkajuttarmata. Tamatumalu saniatigut inuusuttut timikkut nukittussutsikkut inersimasunut unammillersinnaanerat killeqarsinnaasarluni. John Thorsen, GBU-mi siulittaasoq, KNR-imut oqaluttuarpoq

Taammaattoqarnera kingunerikkajuppaa inuusuttut katataasarnerat sungiusariassaartarnerallu. Inuusuttullu 21-nik ukioqalereeraangamik aatsaat arsartaleqqikkajussimallutik. 

Ajornartorsiut taanna GBU-p iliuuseqarfiginiarpaa. 

GBU-p inuusuttut 17-t, 19-t 21-llu ataallugit ukiullik nunatsinni pissartanngorniuuttalernissaat aalajangiussimavaa. Tamanna inuusuttut arsallaqqissut arsaneruneranik ineriartorluarsinnaaneranillu kinguneqassaaq. Taamaaliornikkuttaaq arsartut pikkorissut nunanut allanut unammisartunut ilanngunnissaminnut piareersarluarsinnaanerat aamma qulakkeerniarneqarpoq. 

- Taamaaliornikkut inuusuttut piginnaasallik arsaattaannarnissaat kiisalu arsaannermik aallussiinnarnissaat qulakkeerniarparput, John Thorsen KNR-imut oqarpoq. 

 

AAMMA ATUARUK GBU efter GM: Klubbernes behov skal afdækkes

 

13-t 15-llu ataallugit ukiullik immikkoortortani pissartanngorniuuttaannassapput, naak klubbit immikkoortortani ajugaasut pissartanngorniuteqatigiittarnissaat kissaatigigaluaraat. 

GBU aalajangerpoq 13-t 15-llu inorlugit ukiullik immikkoortortani 2017-mi pissarttanngorniuuttaannarallassasut. Tamannali ukiaru nalilersuiffigineqassaaq.

-Taamak aalajangernermut tunngaviuvoq pissartanngorniuunnerit pisussat amerlammata klubbillu aningaasatigut attukkinneqannginniassammata. Tassami Nunatsinni angalaniarneq akisuvoq, Thorsen nassuiaavoq.

Arfineq-marluk, qulingiluat 11-llu inorlugit ukiullik illoqarfimminni pissartanngorniuuttassapput. 

 

AAMMA ATUARUK Nunarput isikkamik arsaallaqqinnerpaanut unammisalersinnaasoq