GBU: Pissartanngorniunneq Qaqortumiissaaq

Sisimiuni timersoqatigiiffik SAK timersoqatigiiffiit avannaaneersut nunattalu qeqqaninngaanneersut allat sinnerlugit GBU-mut allagaqaateqarpoq, Kalaallit Nunaanni pissartanngorniunnerit illoqarfimmut allamut nooqqullugit, pissartanngorniunnissallu sapaatip-akunneranik kinguarteqqullugit.

- Pissartanngorniunnissamut peqataanissaminnut anngussimasut ilumut tamarmik peqataasinnaanerat, kujataanut angallannikkut pissutsit taamaatsillugit apeqqusernartorujussuuvoq, SAK-p siulittaasua Søren Alaufesen allappoq.

Tassunga atatillugu Kalaallit Nunaanni Arsaattartut Kattuffianni siulittaasoq Lars Lundblad akissuteqaateqarpoq.

Qaqortumi pissartanngorniuttoqarnissaa kattuffiup siulersuisuisa aalajangiusimagaat erseqqissaatigineqarpoq.

- Taama kingusitsigisukkut nuussinissaq ajornakusuussaaq. Pilersaarutit GBU-mi siulersuisut siorna oktobarimi ataatsimeersuarmata aalajangerneqarput, pissartanngorniunnissallu sumiittussaanersut pillugit peqatigiiffiit tamarmik decembarip qaammataani nalunaarfigineqarput, taamanikkullu naammagittaalliortoqarani. Aatsaat piffissaq kingulleq atorlugu naammagittaalliortoqarpoq, siulersuisunilu tamanna paasigaluarlutigu akuersaarsinnaanngilarput, Lars Lundblad oqarpoq.

Pissartanngorniunnissamut anngunniunnerit juulimi aatsaat naammassissarnerat Lars Lundbladip eqqaasitsissutigaa. Billetsinik inniminniisarnerit tamanna pissutigalugu ajornakusoorsinnaasut aamma oqariartuutigaa.

Klubbit arfinillit angalanissamut aningaasartuutissaat katillugit 1,1 millioni koruunit sinnerpaat.

Klubbit marluk, tassa FC Malamuk, Uummannameersoq aamma Eqaluk, Ikerasammeersoq, 500.000-it pallillugit aningaasartuuteqassapput.

N-48, Ilulissaneersoq kiisalu Kugssak 45, Qasigiannguaneersoq, 350.000 koruuniissapput. Nûk, Nuummeersoq, SAK-lu katillugit 300.000-it missaanni aningaasartuuteqassapput.