GBU-p siulittaasorigallagaa siulittaasussarsiornermi sassarnianngilaq
Kalaallit Nunaanni Arsaattartut Kattuffiat sapaatip akunnerata naanerani ataatsimeersuassaaq, tassanilu ilaatigut siulersuisunut siulittaasussarsiortoqassalluni.
Siulittaasuugallartoq Gert Fleischer, siulersuisuni 1990-ikkut naalerneranili ilaasortanngorpoq, siulittaasussarsiornermilu sassarniarnani aalajangerpoq:
- Milittoornerma kingorna sanngilliallalaarnikuulluni pikkunartarami ilaatigut taama angitigisunik imaluunniit amerlatigisunik akisussaaffinnik tigummiaqarneq. Taamaammat eqqarsaatigisimavara akisussaaffimma ilaat ilanngartariaqariaqarlugit, GBU-mi siulittaasuugallartoq, Gert Fleischer, oqarpoq.
John Thorsen GBU-mi juulip qaammataani siulittaasutut tunuarmat Gert Fleischer siulittaasuugallartutut inissinneqarpoq.
Isikkamik arsaallutik nunanut allanut unammisartunut sungiusaasuusimasup, Tekle Ghebrelulip, taamani soraarsitaammat John Thorsen tunuarpoq.
John Thorsenilli siulittaasussarsiornissami sassaqqinniarnini tusagassiuutinut sisamanngornermi nalunaarutigaa.
