GBU-mi siulersuisut GM-imi unammeriaasissaq allanngortippaat - tamannalu GBU-p inatsisaanut unioqqutitsineruvoq.
- Maniitsumi anngunniutereerluta GBU-p inatsisai misissorpagut, paragraf 5-imi paasivarput unammisaqattaarnermi ataatsimiititaliap kisimi inatsisit allanngortissinnaagaa, tassa GBU-mi siulersuisut kisimik inatsit allanngortissinnaanngikkaat. Inatsisini aamma allaqqavoq kingusinnerpaamik apriilip aallaqqaataani inatsisit allanngortinneqarsinnaasoq, taama John Eldevig oqarpoq.
GBU-p inatsisaani allassimavoq unammisaqattaarnermi ataatsimiititaliap kisimi unammisaqattaarnissat allanngortissinnaagaat. GBU-lli kingullermik ataatsimersuarnermini inatsimmik allannguinikuupput, tassa GBU-p siulersuisuunerisa unammisaqattaarnissat allanngortissinnaalermatigit.
Tamanna GBU-p siulittaasuata Lars Lundblad-ip ippassaq Nunarput Aasaaneranimut taama oqaatigaa. Taanna eqqortuusoq unammisaqattaarnermi ataatsimiitiliami ilaasortap Jens Mølgaard-ip KNR-imut uppernarsarpaa.
-Taamaalluarsinnaavoq, kisianni kikkut tamarmik paasisinnaasaannik inatsisiliortoqartariaqaraluarpoq, taamaasilluni suut inatsisit malinnerigut takuneqarsinnaalissagaluarmata.
John Eldevig oqarpoq.
John Eldevig-ip oqaatigaa GBU-mi siulersuisut unammisaqattaarnissat tallimanngornermi allanngortikkaat.
GBU-p inatsisaanni takuneqarsinnaavoq inatsisit allanngorniaraanni kingusinnerpaamik aprillip aallaqqaataani allanngortinneqarsinnaasut.
- Klubbit allat taanna pillugu oqaloqatigaagut, Kangaamiuni arsaattartut oqarput anngunniunnerit suli aallartinnginneranni ataasiinnaq anngussinnaasoq nalusimanngitsuugunikku peqataasimassanngikkaluarlutik, taakkumi ilimagereersimavaat B-67-t anngunniunnermi ajugaassasut, anngunniunneq aallartinnginnerani inatsisit nalusimanngitsuugunikku anngunniunneq allatut ingerlasimassagaluartoq oqaatigalugu.