Gazamut killeqarfini matuai
Israelip Gazamut killeqarfini tamaasa ullumi matusimavai. Taamatut mattussinikkut Gazamut nioqqutissanik pilersuineq eqqorneqaannarani, uuliamik benziinamillu pilersuineq eqqorneqarpoq.
Allattoq Mads Lynge
Tamatuma kingunerani maanna Gazap annersaa innaallagiaqanngilaq.
Palæstinamiunut 1,4 miliuuniusunut inuussutissanik pilersuineq sisamanngorpat imaluunniit tallimanngorpat unitsivinneqassasoq, Naalagaaffiit Peqatigiit oqaaseqartitaat, palæstinamiut qimaasut tammaarsimaffigisaanni sulisoq oqarpoq.
Røde Korsip nunat tamat akornanni ikiuiniaqatigiiffiata oqaaseqartitaa oqarpoq, Gazami napparsimmaviit suli nakorsaataateqartut, kisianni ullualunnguit qaangiuppata nakorsaatissaarutissasut.