Gazamut killeqarfiit Obamap ammaqquai
Taamaammat tamaanga immikkut aallartitassamik toqqarpaa George Mitchell, ilutigalugulu Israel kaammattorlugu Gazamut killeqarfiit ammaqqullugit, ikiuutissat nioqqutissallu eqqussuunneqaqqittalerniassammata, sakkuaakkunnaarnerlu ataavartumik ikorfartorneqarniassammat. Nutaarsiassaqartitsivimmi Ritzauimi taama allaaserinittoqarpoq.
Eqqisserusuttunut tapersersuerusunnerput takutittariaqarparput, sakkuaakkunnaarnerlu ataavassappat Gazamut killeqarfiit kikkunnilluunniit aqqutigineqarsinnaasariaqarput, Obama oqarpoq.
Taamaaliornissarli Hamasikkunnit iluaqutiginiarneqarsinnaammat eqqarsarnartoqartoq, Israelimi ministeriunerup Ehud Olmertip siunnersortaasa ilaata kinaassutsiminik taaserusunngitsup ippassaq nutaarsiassaqartitsivimmut Reutersimut oqaatigaa.
Taassuma erseqqissaatigaa, killeqarfiit Israelip piffissami qaninnermi ammarnaviarunanngikkai, oqarporli, inuussutissat, nakorsaatit ikummatissallu nunaminertami Gazami innuttaasunut, 1,5 millioniusunut, tunniussuunneqarumaartut. Allat, soorlu Gazap piorsaqqinneqarnissaanut atugassat, cementi, sisaat assigisaallu, utaqqinneqarsinnaasut.
