Gazami aassunneqisumik akersuuttoqarpoq

Gaza-mi Palæstinamiut sakkortuumik eqqissiviilliornerat ingerlajuarsinnarpoq. Hamas-imeersut suliniaqatigiiffimmut Fatah-mut ullaaq saassussimmata inuit tallimat toqutaapput.

Suliniaqatigiiffiit Hamas aamma Fatah Palæstinamiut namminersorlutik ingerlatsineranni naalakkersuisoqatigiikkaluarput. Kisianni isumaqatigiissinnaanngillat.

Arfininngormalli sakkulersornitik unitsinniarlugit pingasoriarlutik isumaqatigiissuteqartaraluarput, nalunaaquttalli akunnialunngui qaangiukkaangata akersuuteqqilersarput.

Sakkuaakkunnaarnissamik isumaqatigiissut kingulleq ippassaq unnukkut isumaqatigiissutigineqarpoq, unnuarli suli naanngitsoq isumaqatigiissut aattaqaqisumik atorunnaarsinneqarpoq.

Hamas-imiut sakkulisartut ullaaralaaq Fatah-p nuimasortaasa ilaata angerlarsimaffia isaaffigaat. Angut taanna angerlarsimanngilaq, kisianni paarsisuisa ilaat tallimat toqunneqarput.

Ippassaq suliniaqatigiiffiit taakkua marluk akersuunneranni 15-it toqutaapput. Gazamilu pissutsit innuttaasut imminnut sorsuunnerattut isikkoqaleriartuinnarpoq.

Akersuunnerit ersersippaat suliniaqatigiiffiit siuttuisa naalakkersuisut tusarnaarnissaat soqutiginngikkaat, oqartussaatitaanerallu akueriumanngikkaat.

Tamanna ippassaani naqissuserneqarpoq, akersuunneq sakkortusineqarmat kiisalu nunap iluani pissutsinut ministeri, arlaannaannulluunnit attaveqanngitsoq, Hamas-ip Fatah-llu naalakkersuisoqatigiivinit tunuarmat.

Alaatsinaattut isumaqarput Hamas-ip aamma Fatah-p naalakkersuisoqatigiinnerat piviusumik tunngaveqanngitsoq.

Fatah-mit eqqisseqatigiinnissaq oqaloqatigiissutigerusunneqarpoq, Hamas-illi anguniakkami anguniarnerini uivertitsinissaq qinersimavaa. Tassami Israelimik eqqisseqatigiinnissamik isumaqatigiissuteqarnikkut, Israeli naalagaaffittut akuerineqassammat tamannalu Hamas-ip akueriumanngiluinnarpaa.