Gaza mattunneqaqqippoq

Taamaalilluni qanittukkut Palæstinamiut miliuunit aappaata affaanik amerlassusillit avammut mattunneqaqqissapput. Taamaattorli siusinnerusumut naleqqiullugu allannguuteqartoqarpoq:

Sapaatip akunnerisa marluk matuma siornagut Palæstinami muslimit ingasattajaarniat Hamasikkut Gazap Igitsinimut killeqarfiani qarmarsuaq aserorpaat, taamaalillutik Israelip qaammatini arfineq-pingasuni mattussinera qaangersinnaaniassagamikku.

Taamanimiit Palæstinamiut hunnoruju tuusintilikkuutaat Igitsinimut isaapput, mattussaanermillu nalaanni nioqqutissat pissarsiarisinnaanngisatik pisiareriarlugit uteqqittarlutik. Ullumikkumiilli taamatut niuerniariartarneq unitsinneqarpoq.

Tassami killeqarfimmi Igitsinimiut ungerutissianik kapinartulinnik ikkussuileruttortut Hamasikkormiut qernertunik atisalersorsimasut sakkulisartullu nakkutilliissuupput. Taamaaliornissarmi Hamasip Igitsinimiullu Cairomi ulluni kingullerni isumaqatigiissutigisimavaat.

Ulloqeqqaraa Gazami oqaatigineqarpoq Hamasip Igitsinimiut isumaqatigiissuteqarfigisimagai, pingaarutilinnik soorlu ikummatissanik allanillu pilersuineq ingerlaannassasoq.

Tamanna arlalinnit nuannaarutigineqanngeqaaq. Soorlu Israelimiunit USA-millu, aammali Hamasip unammillertaanit præsident Abbasimit suliniaqatigiiffianillu Fatahmit, Vestbreddenimiittunit.

Taakkua Cairoliarsimapput Hamasillu Igitsinimiunik isumaqatigiissuteqarnissaa pinngitsoorteriaraluarlugu, tassami taakkua Palæstinamiunik pilersuineq kisimiillutik aqukkusukkaluaramikku. Susaarlutilli Cairomiit angerlaannarsimasut oqaatigineqarpoq.

Gaza tassaavoq nunap ilaa nunarsuatsinni inunnit ataatsimoortunit inoqarnerpaaq.