Gassip puui 120-t Spaniami qaartartumeeriniarnermut atorneqarniarsimagaluit nassaarineqartut
Gassip puui 120-t qaartartumeerisoqarneranut atorneqarsimagunartut Barcelonami politiit nassaaraat. Barcelonami Cambrilsimilu qaartartumeerisoqarneranut atatillugu Spaniami politiit misissuinerminnit nutaarsiassaqartitsivimmut AFP-imut taama paasissutissiipput. Saassussinerit inuit 14-t inuunerinik akeqarput 100-llu sinnerlugit ikiligaallutik.
AAMMA ATUARUK Barcelonami biili inuit tungaannut apuisoq
Saassussisutut pasineqartut Barcelonap kujataata-kitaaniittumi Alcanarimi illumut attuumassuteqartut politiit pasivaat.
- Illumi tassani qaartartumeerinissat arlallit piareersarneqarsimasut paasinarsivoq, Cataloniami politiit pisortaat Josep Lluis Trapero nutaarsiassaqartitsivik AFP naapertorlugu oqarpoq.
Illup qaartinneqareernerata kingorna inuit marluk toqutaasut kinaassusersineqartut Barcelonap politiivisa uppernarsaraat nutaarsiassaqartitsivik Reuters allappoq. Taakku peqqarniisaarnianut qaartartumeerisunut aqqaneq-marluusunut peqataasut aamma politiit oqaatigaat.
AAMMA ATUARUK Finlandimi savilersortoqarnera peqqarniisaarniarnertut politiinit paasiniaaffigineqartoq
Peqqarniisaarniat aqqaneq-marluusut siornatigut saassussisareersimanersut politiinit qulakkeerneqarsinnaanngilaq.
Angut qaartartumeerisoqarnerani biilinik ingerlatsisoq Younes Abouyaqoubi spaniami nutaarsiassaqartitsiviit naapertorlugit suli tigusarineqanngillat.
/ritzau/