Gassinik aniatitsineq annikillisarneqassaaq

juunip 07-at 2007 16:19

Nunarsuatsinni nunat suliffissuaqarnikkut siuttuusut – G8-mik taaneqartartut – Tysklandimi ataatsimeeqatigiinnerminni isumaqatigiissutigaat gassinik silaannarmik kissakkiartortitsisunik aniatitsineq annertuumik millisarneqassasoq – taakkumi nunarsuarmik kiannerulersitsimmata.

Ataatsimeeqatigiinnermi tikeraartitsisup Angela Merkelip taama isumaqatigiissuteqarneq ilorraap tungaanut alloriarnerujussuartut taavaa.

Isumaqatigiissutigineqartoq naalagaaffiit G8-mut ilaasut tamarmik peqataaffigaat, aammattaaq USA-p. Tassa nunat gassimik CO2-mik aniatitsinertik minnerulersissallugu pisussaaffilerneqassapput. Tuluit Nunaata ministeriunerata Tony Blairip taama isumaqatigiissuteqartoqarsinnaanera ukiup ataatsip matuma siornagut takorloorneqarsimanngikkaluartoq, qaammatillu ataatsip siornatigut qularineqarsimagaluartoq oqaatigaa.

Taamaattorli maluginiarneqartariaqarpoq gassimik CO2-mik aniatitsinerup 2050-imi affaannanngortinneqarnissaanut pisussaaffiliinermut USA ilaanngimmat, isumaqatigiissummili erseqqissarneqarpoq anguniakkap tamatuma anguniarnissaa USA-p isumaliutigeqqissaarniaraa.

Silaannaap pissusaanut atatillugu alloriarnissaq tulliuttoq tassaavoq, Naalagaaffiit Peqatigiit suliassami ilaatinneqarnissaat. Tassungalu atatillugu Naalagaaffiit Peqatigiit decembarimi Balimi ataatsimeersuarnermik aaqqissuussinissaat.

Isumaqatigiissutissap qaqugu naammassineqarnissaa aamma isumaqatigiissutigineqarpoq. Tassa 2009-mi isumaqatigiissuteqartoqarnissaa siunnerfigineqarpoq, taamaalilluni Kyoto-mi isumaqatigiissut 2012-imi atorunnaarpat nutaamik piareersimasoqarniassammat. Tamanna Danmarkimut pingaaruteqarsinnaavoq, tassami Naalagaaffiit Peqatigiit 2009-mi Københavnimi silaannaap pissusaa pillugu ataatsimeersuartitsisussaammata.