Gassimik toqunartulimmik najuussuisimasut ajunngillat
Nal. 12.00 nutartigaq
Gassimik najuussuisimasut 39-t ippassaq unnuap-qeqqata missaani Dronning Ingridip Napparsimavissualiaanneqarput, passunneqarnermillu kingorna peqqissiartortut peqqissaasut ningiuat Ella Skifte oqarpoq.
- Tikiunneqartut tamarmik anersaartorniarnermikkut ajornartorsiuteqarput, quersorlutik niaqorlullutillu, kisianni iltilersuummik penicillinamillu nakorsaaserneqarnermik kingorna tamarmik iluarsipput, Ella Skifte oqarpoq.
Nuummut aallarunneqartut ilaat arfineq-marluk aamma ilungersunarnerusumik eqqugaapput.
Gassimik toqunartulimmik najuussuisimasut meerartaqanngillat, unitsinneqartunilu nukarlersaat 16-inik ukioqarpoq angajullersaallu 61-inik ukioqarluni.
Maniitsumi Brugsenimi pisiniat anersaartorniarnikkut ajornartorsiorunik imaluunniit quersorlutillu niaqorlukkunik Maniitsumi napparsimavimmut saaffiginneqquneqqarput.
Maniitsup napparsimavianut unnuap ingerlanerani saaffiginnittoqarsimanngitsoq immikkoortumi peqqissaasoq Dorthe Simonsen KNR-imut oqarpoq.
- Upalungaarsimanerput pisumi matumatut ittumi pitsaanerpaamik ingerlasoq paasillugu naammagisimaarnartorujussuuvoq, naalakkersuisoqarfiup pisortaa Ann Birkekær Kjeldsen oqarpoq.
Politiinit Sulinermullu nakkutilliisoqarfimmit paasissutissanik takkutoqarnissaata tungaanut Maniitsumi Brugseni matoqqagallartinneqarpoq.