Gassimik nassaarneq allat pilersaarutaannik aallanngortitsinngilaq
- Tusagaq nuannerpoq. Kisianni imaanngilaq uuliaqarfissuarmik gasseqarfissuarmilluunniit nassaartoqartoq, Arne Rosenkrands oqarpoq.
Taanna GOIA-mi, tassa uuliasiortitseqatigiiffiit nunatsinniittut peqatigiiffianni Greenland Oil Industri Associationimi, siulittaasuuvoq.
Qeqertarsuup avataani gassimik nassaartoqarnera, taamaalillunilu gasseqarlunilu uuliaqarsinnaanera ilimanarnerulertoq, Arne Rosenkrandsip soqutiginartutut oqaatigerusuppaa.
Kisianni taanna naapertorlugu, tamanna pilersaarutinik allanngortitsissanngilaq:
- Oqartoqarsinnaanngilaq Kalaallit Nunaanni uuliarujussuarmik nassaartoqaleqisoq. Tusagarli aamma nuanniitsuunngilaq. Nassaartoqarsimanngikkaluarpalluunniit uuliasiortitseqatigiiffiit ujarlernertik unikaallatsissimassanngikkaluarpaat. Tassalu uuliasiortitseqatigiiffiit namminneq pilersaarutitik malillugit ingerlaannarnissaat ilimanarneruvoq, Arne Rosenkrands oqarpoq.
Taanna GOIA-mi siulittaasuunermi saniatigut aamma Dong Energy-mi immikkut siunnersortaavoq. Dong Energy allanik suleqateqarluni imartami Cairn Energyp uuliamik ujarlerfiata saniliani uuliamik ujarlerpoq.
Paasisat kingulliit tunngavigalugit Dong Energyp suleqataasalu misissuinermik nangeqqinnissaata ilimanassusia 1-miit 10-mut missingiuseraanni, qanoq oqaatigerusunneraa aperigatsinni, Arne Rosenkrands ima akivoq:
- Isumaqarpunga 5-ip missaaniissasoq. Aalajangiinissamut suli siusippallaarpoq. Aalaakkaasumilli tunngaveqarluta aalajangiinissatsinnut suli sulivugut, Arne Rosenkrands GOIA-mi siulitaasuusoq Dong Energy-milu immikkut siunnersortaasoq oqarpoq.
