Garder Foundation nersornaasigassatut piukkunneqarpoq
Nunat Avannarliit Siunnersuisoqatigiiffianneersut Nuummi ulluni makkunani ataatsimiipput, Avatangiisinut Nunat Avannarliit nersornaasiuttagaat kimut ukioq manna tunniunneqassanersoq aalajangissallugu.
Kalaallit Nunatsinniit nersornaasigassatut piukkunneqartoq tassaavoq Narsap Kommuneaninngaaneersoq, Gardar Foundation.
Suliniaqatigiit taakku kujataani illutoqqanik nunataanillu aserfallattaaliinermik suliaqartuupput, tamannarpiarlu pissutigalugu Avatangiisinut nersornaammik ukioq manna tunineqartussatut piukkunneqarput. Finn Lynge suliniaqatigiiffimmik aallartitsisunut ilaavoq.
Kalaallit Nunaat tamaat isigissagaanni Kujataa tassaagunarpoq assigiinngiiaarnerpaasoq. Qallunaatsiaat oqaluttuassartaat kikkut tamarmik ilisimagunarpaat, taakku ukiut ukiut tusidtit affaasa missaanni kujataaniissimapput. Ilutigalugu oqarsinnaavugut, Nanortallip pigisaani piniartut innuttaasullu Nunatta kitaani piniariaasitoqqamik ingerlatsisunut qaninnersaasut, Finn Lynge oqarpoq. Nangipporlu:
- Ullutsinnut pigutta, savaatillit nutaaliaalluinnartumik ingerlatsipput, tamakkulu akornanni amerikamiut Sorsunnersuup Aappaata ingerlanerani mittarfittaarput, tamannalu aamma sorpassuartigut kinguneqarpoq. Taamaammat maani suna tamarmi allanngorartorujussuuvoq, Finn Lynge oqarpoq.
”Gardar” tassaavoq qallunaatsiaat Igalikumut taaguutaat. Gardar qallunaatsiaat taamanikkut biskoppeqarfigaat, suliniaqatigiiffiullu massakkut suliassaraa Qassiarsummi Tjorhildurip oqaluffiata aserfattaalinissaa isumagissallugu. Nunatta Kujataanut takornariat amerliartornissaannut suliniutit Gardar Foundationip anguniagaanut aamma ilaapput – nunarsuaq tamakkerlugu ukiuni makkunani ilerfiartartut nunanullu iluartuutitaliarlutik takornariartartut milliuunilippassuit assigalugillusooq iliortoqartarsinnaanersoq misissussallugu.
Avatangiisinut suliniuteqarluartutut nersornaasiinissamut piukkunneqarnertik Finn Lynge-p nuannaarutigaa. Garder Foundation ajugaanngikkaluarpalluunniit piukkunneqarneq Kalaallit Nunaata Kujataanut sunniuteqanngitsoornavianngilaq.
Nunat Avannarliit Siunnersuisoqatigiivisa nersornaasiuttagaat 350.000 koruuniuvoq.
