Galthea 3-mi angalaqataasoq nuannisarluarsimasoq

Silaannaap allanngoriartornera, bakteriaqassuseq, allisitsiuterujussuit, misissuisarfiit dna-llu. Tamakkuupput galathea 3-mik taallugu ilisimasassarsiornersumi Sapaatip-akunnerata naanerani Nuummiittumi suliat ilaminiinnanngui.

Illoqqortoormiormiu Esajas Arqe, 15-inik ukiulik immikkut ittumik Narsarsuarmiit Nuummut sakkutuut umiarsuaannut Vædderen-imut ilaalluni ingerlaarnermi peqataatitaasoq aperaarput peqataalluni qanoq-innersoq.

-Assut nuannersorujussuuvoq, misigisaqartorujussuuvungalu.

Nunatta kujataani immap naqqanit marrarmik tigusilluni misissueqataasimavoq. Marraq meterikkaarlugu aggoriarlugu uumasoqarnersiorlugu misissuiffigisarsimavaat, ilaalu qeritittarlugu.

Esajas Arqe angalaqataanermi saniatigut aamma allanik misissuinerinnaanngitsumik suliaqartarsimavoq, soorlu ullaakkorsiornissamut nerrivilioqataasarluni.

Esajas Arqe-p oqaloqatigineqarnera tamakkerlugu Nunarput Ullumi ualeru aallakaatinneqalerpat tusarsinnaajumaarparsi.