Galatheami ernguttarsimaqaat
Ilisimasassarsiorluni angalanermi Galatheamik taaneqartumi immap uumasui eqqumiitsut kisimik spritimut ikineqarneq ajorput.
Umiarsuaq umiarsualivimmiitillugu agguaqatigiissillugu inuup ataatsip immiaaqqat qulit ullormut imertarpai – angalanermilu agguaqatigiissillugu umiarsuaq ullut arfinilinngoraangata umiarsualivimmiittarpoq.
Tamanna tupigisassaanngitsoq sakkutuut imarsiortut qullersaqarfianneersut oqaatigaat. Tassami angalanermi ullunik 258-inik sivisussuseqartumi assigiinngitsunik atuineq annertoqaaq.
- Soorlu angalanermi equutissanik atuineq kisitsisinngorlugu annertoqaaq, sakkutuut imarsiortut tusagassiisartuat Klaus Randrup Rasmussen oqarpoq.
Aap, assigiinngitsunik atuineq kisitsisinngorlugu annertuvoq. Angalanermi Vædderenimi immiaaqqat imerneqartut 33.000-iupput, imigassat kimittuut 500 liiteringajaallutik, tassa viinnit viinnillu kimittunerit saniatigut.
Tassa tamakkua imerneqartarput umiarsuup umiarsualivimmiinnerani, umiarsuarlu ulluni 258-ini angalanermini ullut 42-t umiarsualivimmiippoq. Tassami umiarsuaq ingerlaartillugu imigassartortoqaqqusaanngilaq.
- Umiarsualivimmiitilluta ilisimasassarsioqataasut sunngiffimminni imigassartortarput uagullu angalaqatiminnut akornusersuinngippata naalakkersugassarinngilavut, Klaus Randrup Rasmussen oqarpoq.
Aviisip akeqanngitsup Urbanip kisitsisit atuisimanermut tunngasut pissarsiarisimavai. Tassa ilisimasassarsiorluni angalaneq pillugu oqallittoqareersorlu. Ilaatigummi oqallisigineqarmat ernguttartut tassaanersut aviisiliortut ilisimatuulluunniit. Aamma oqallinnermi ilisimasassarsiorluni angalanermi angusat ilaatigut sullugineqarput.
Sakkutuut imarsiortut tusagassiisartuata agguaqatigiissillugu immiaaqqat qulit imerneqartarnerat uppernarsarpaa, oqaatigaluguli angalaqataasut umiarsuarmit niugaangamik imigassanik nassartarsimanissaat ilimagisariaqartoq.
- Angalaqataasut imigassamik atuinerat annerusumik isiginianngilarput, suliartimmi nakkutigippassuk allanillu akornusersuinngippata qassiiliuutissarinnginnatsigu, Klaus Randrup Rasmussen naggasiivoq.
