Galathea-mi peqataanissamut periarfissallit sisamat aqqi

Sakkutuut umiarsuaat Vædderen qaammatini arfineq-pingasuni ilisimasassarsiornermut Galatheamut atorneqassalluni Danmarkimi unnulluinnaraa pituussaaginnaqaaq. Peqatigitillugu nunatsinnit peqataasinnaasut aqqi sisamat ullumi saqqummiunneqarput.

Ilisimatuut ilisimatuunngorniallu, ilinniartitsisut atuartullu Nunarsuaq kaajallangajallugu imavinni miilini 39.000-ini Vædderen atorlugu angalanerminni aqqutaani ilisimatusarnermut atatillugu misissugassanik katersissapput.

Galatheamik piareersaaneq ukioq sinnerlugu ingerlasimasoq nunatsinniit aamma internetsi atorlugu malinnaavigineqaqqissaarsinnaasimavoq, unammisitsisoqarneranilu apeqqutit pinngortitamut tunngasut akineqarsinnaasimallutik. Ajugaasoq timmisartorluni oktobariulerpat Afrika Kujallermukassaaq, Cape Townimit Vædderimut ikissalluni, tassanngaanniillu Sikuijuitsoq aqqusaarlugu Australiamut Galatheamik ilisimasassarsioqataassalluni..

Unammisitsinermi nunatsinnit apeqqutinik akiuilluarsimanerpaat sisamat aqqi, Nunat Avannarliit piorsarsimassutsikkut suliniaqatigiiffiannit, NAPA-mit, Nuummi ullumi saqqummiunneqarput. Tassaappullu Paninnguaq Geisler Rafaelsen Aasianniit, Arne Ringsted aamma Jeppe Mortensen Nuummiit kiisalu Sascha Schiøtt Qaqortumiit. Qaqortumeersoq, 20-inik ukioqartoq, pinngortitamik soqutiginnittuaannartuusoq, septembarip ulluisa qulingiluaanni Nuummukassaaq.

-Nuanneqaaq, nuannaartorujussuuvunga, pissanganermik eqqarsaatinik ulikkaarlunmga, nalullugulu maannakkut sorpiassanerlunga, nuannaangaarama.

Sascha Schiøtt neriuppoq angalaqataassagaluaruni paasisaqarluarsinnaassalluni.

- Nutaamik misigisaqarnissaq, taavalu forskerikujuit, biologikujuit, tamakku assigiinngitsut, qanoq suleriaaseqarnersut, qanorlu sulisarnersut, paasinissaat pilerinartippara, oqarpoq.

Paasisanimitaava sumut atorniaramigit?

Uanga nammineq biologi Universitetimi atuassamaarakku, atuarnissannut arlaannik paasisaqalaarnissaq nuannerunarnermik.

Sascha Schiøtt, Qaqortumeersoq, aasaq ilinniarnertuunngortoq, fagit biolog-inngorniarluni pisariaqartitani ilinniariartorlugut Sisimiunut qanittukkut aallassaaq.

Ilisimasassarsiorneq Galathea aallarnerlugu umiarsuaq Københavnimit ullumi aallarpoq, Savalimmiunut nunatsinnullu ingerlaarnermini Norgemi amuteqqaalaassalluni.