Galathea 3-rmiut assut ernguttarsimapput
Danskit nunarsuaq tamakkerlugu ilisimmasassarsiornersuanni naammasseqqammersumi Galathea 3-mi imigassartornerujussuaq ajornartorsiutaasimavoq, allaallu atortittartunut pulaartarsimanerit nereqatigiinnerni tanngassimaarutigalugit nipituuliuutigineqartarsimasut, angalanersuarmut ilaallutik malinnaasut avisimit Jyllandspostenimeersut nalunaarusiorsimapput, tamannalu pillugu Jyllandspostenip Danmarkimi sakkutuut imarsiortut sullarlussimanerarlugit isornartorsiorai, avisimi Politikenimi allaaserineqarpoq.
Jyllandspostenimit angalanersuarmut malinnaatitaasut allapput ilisimasassarsiorluni angalanersuup nalaani siorna oktobarimili pissutsit ajorsiartornerat malugineqarsinnaalersimasoq, ingammik meeqqat inuusuttuaqqallu atuartut ilisimasassarsiornermut ilaatinneqarnerat eqqarsaatigalugu ernumanarsisimallutik.
Sakkutuut umiarsuaat angalanersuarmi atorneqartoq Vædderen, nunalikkaangat ilaasut pigaartuunngitsut assut ernguttarsimapput, nunamiinnaanngitsoq aammali umiarsuarmi, meeqqanut inussuttuaqqanullu ilaasunut assut isukkuleertitsisarsimallutik.
Ernguttoqarpallaartarnera umiarsuarmi pisortamut naammagittaalliutigineqarsimagaluarpoq kinguneqanngitsumilli.
Danmarkip indiaaqqani nunasiaatigisimasaanut qeqertamut Sankt Croiximut tulakkamik, umiarsuup pisortaata umiarsuaq illoqarfimmit Frederikstedimiit Christianstedmut nooqqusimavaa, illoqarfik taanna imerniartarfeqarnerummat.
Umiarsuarmi erngunnersuaq tusaamasaalersimavoq, allaat amerikamiut aallartitaqarfiini umiarsuaq taaguuserneqarsimalluni The Party Boat, tassa angallat ernguffik.
Vædderenip pisortaa kontraadmiral Nils Wang avisimut Politikenimut oqarpoq, umiarsuarmi imigassarsortornermut ersarissunik malittarisassaqarmat pissutsit Jyllandspostenimi aallaaserineqartut ilisarisinnaanngikkini.
