Galathea 3 Nuummut aqqusaarpoq
Umiarsuaq alapernaarsuut Vædderen Nuummut tikippoq.
Ilisimasassarsiorluni angalaneq Galathea 3 taamaasilluni Nuummut tikippoq, ilisimasassarsiornerullu immikkoortuata siullianni kalaaleq Minik Rosing aqutsisuusussaavoq.
Tusagassiortunik ullaaq tikilluaqqusivoq, Kalaallillu Nunaata imartaa Galathea 3-mut pingaaruteqarnerarlugu:
- Silap pissusaa immallu sarfarnerata imminnut ataqatigiinnerat Galathea 3-p misissuiffigaa, misissuinerillu takutippaat Kalaallit Nunaata kangimut imartaa silap pissusaanut sunniuteqarluartoq. Nunatta Islandillu akornanni imartap silap pissusaanut sunniuteqarluartoq paasivarput, Minik Rosing oqarpoq, nangillunilu:
- Ataatsimut isigalugu oqarsinnaavugut Kalaallit Nunaata eqqaani ilisimatusarneq nunarsuatsinnut pingaaruteqartorujussuusoq. Taamaammat nuannaarutigaarput Kalaallit Nunaata imartaani ilisimatusaatigalugu angalasinnaagatta, Minik Rosing oqarpoq.
Taanna oqarpoq ilisimatuut pissarsiarerusutatik pissarsiarisimagaat, sulili uissuumminarsinnaasunik nassaartoqarsimanngitsoq.
Galathea 3 kalaallimik atuartumik peqataatitaqartuussaavoq.