Gaddafip illoqarfimmik qaartartumiivoq.

Danmarkip Radioa taama tusarliivoq.

Illoqarfik pikitsitsinianit tigusarineqarnikuuvoq, Gaddafillu illoqarfik taanna tigusareqqikkusuppaa. Raz la Nouf Libyami illoqarfiit pingaarnersaata Tripolip kangimut 600 kilometerisut ungasitsigisumiippoq, sakkutuullu Raz la Noufip tungaanukartut ippassarli nalunaarutigineqarpoq.

Pikitsitsiniat sakkutik inoqajuitsumut taamaammat toqqorsimavaat, inuillu kangimut qimarrapput, illoqarfiit annersaasa tulliannut Benghazimut qimarrakkamik.

Timmisartut qulimiguullillu atorlugit saassussisoqartoq nalunaarutigineqarpoq, soorlu aamma qaartartunik igeriuttakkanik saassussisoqartoq.

Gaddafip sakkutuui sakkugissaarnerupput, pikitsitsiniallu Gaddafip sakkutuuinut naleqqiullugit susinnaassuseqannginnerusutut nalilerneqarlutik. Inuinnaat sakkutuullu Benghazimi toqorarneqartut aamma nalunaarutigineqarpoq.

Nunat killiit illersoqatigiiffiannit NATO-mit Libyami iliuuseqarnissaq maanna pilersaarusiorneqaleruttorpoq. NATO-p qullersaa Anders Fogh Rasmussen ullumi taama nalunaaruteqarpoq.

Qanorli iliuuseqartoqarnissaa isumaqatigiinngissutigineqarpoq, Libyallu silaannartaani timmisartoqqusinnginnissamik piumasaqartoqassanersoq aamma oqallisigineqarluni.

NATO-mi nunat ilaasortat illersornissamut ministerii Bruxellesimi sapaatip-akunnerup massuma ingerlanerani naapittussaapput, Libyami pisut pillugit ataatsimeeqatigiittussaallutik.