Gaddafimut tapersersuiunnaaqqullugit kajumissaarneqarput
Naalagaaffiit illersoqatigiit Libyamik saassussinerat ullumikkut nangeqqinneqarput, Muammar Gaddafimillu tapersersuisut Gaddafimik piaarnerpaamik tapersersuiunnaartariaqartut, Frankrigip præsidentiata Nicolas Sarkozyp tuluillu ministeriunerata David Cameronip kajumissaarutigaat:
- Gaddafi sukkanerpaamik tunuartariaqarpoq, Sarkozy aamma Cameron oqarput.
Libyamiut Gaddafimut illuatungiliuttut Gaddafip tunuarnissaa siunertaralugu politikkikkut iliuuseqartariaqalernerat taakku aamma kajumissaarutigaat.
Nunat tamalaat peqataaffigisaannik ataatsimeersuarnissaannut aqaguttoq, nunaminnik siuttut taakku marluk taama kajumissaaruteqarput, Libyami innuttaasut siunissaat pitsaanerusoq matumani anguniagaalluni.
Nunat assigiinngitsut 35-t nunanut allanut ministeriisa Londonimi aqagu ataatsimeersuarnissaaannut peqataanissartik nalunaarutigereerpaat.
Nunat killiit illersoqatigiiffiat NATO, Naalagaaffiit Peqatigiit kiisalu Nunat arabiamioqarfiusut suliniaqatigiiffiat ataatsimeersuarnissamut aamma peqataatitaqarniarput.
