Gaddafikkormiut EU-mut iseqqusaajunnaarput

Taaneqartut akornusersorlugit iliuuseqarfiginissaat EU-mi ilaasortat pisortatigut akuersaarpaat.

Aammattaaq sakkunik pisisinnaajunnaarput nunanilu EU-mut ilaasortani 27-usuni aningaasaataat allallu nalillit pigisaat tiguneqarsinnaajunnaarsinneqarlutik.

Libyami pikitsitsisut oberst Gaddafillu sakkutuui akersuuttuarsinnarput, Gaddafilli sakkutuui sakkugissaartut sakkortuumik akiuigaluartut pissaaneqarfia milliartuinnarpoq.

Gaddafip tapersersortaasalu inissisimaffiata Tripolip kangiani kitaanilu akersuuttoqarpoq. Maannakkut Tripolimiit 200 kilometerisut kippasitsigisumi Misratami Gaddafip sakkutuui pikitsitsisullu akersuupput. Takunnittut oqaluttuarput sakkutuut tunuariartortinneqarlutik illoqarfimmi sakkutooqarfiup ilaminiinnanngua pissaaneqarfigileraat, timmisartorlu illoqarfimmi radioqarfimmik qaartartumeeriniartoq pikitsitsisut nakkartissimagaat. Illoqarfimmi Sawaijahmi Tripolimiit 50 kilometeriinnarnik ungasitsigisumi sakkutuut saassussinissaat pikitsitsisut utaqqiinnarpaat. Sakkutuut 2000-it illoqarfik ungusimavaat, politiilli pisortaat pikitsitsisunut ilanngussimasoq oqarpoq, toqutaanissartik soqutiginagu akiuutissamaarlutik. Tripolimi innuttaasut sakkutuut tungaannut pallitsaaliasaliorsimasut. Naliliisartut ilimagaat pikitsitsisut Gaddafi tigusariinnanngikkunikku toqukkumaaraat, Gaddafilli sakkutuui sakkugissaaqigamik aattaqaqisumik akiuukkallarsinnaasut. USA-p Europami iligisani Gaddafimik tatisimanneqquai malunnaatilinnillu akornutiginnaasaanik iliuuseqaqqullugit. USA-p nunanut allanut ministeria Hillary Clinton oqarpoq Gaddafimik akiuiniartut sutigulluunniit ikiorusullugit, sakkutuunilli ikiorsiinissani eqqaanngilaa.

Libyamiit Tunesiamut qimaasut akunnerup ataatsip ingerlanerani 1000-it killeqarfikkoortaramik ulapititseqaat. Tusakkat naapertorlugit februaarilli 17-anni pikitsitsineq aallartimmat 100.000-ikkaat nunamiit qimaareerput.