Nunarsuatsinni sivisunerpaamik kisermaasilluni
naalakkersuisuusut ilaat, Libyen-imeersoq, Muammar Gaddafi, inupalaatut peqqarnissaarnianut
illersuisuusutut isigineqarunnaarpoq, nunaminilli
ingerlatsisutut isigineqalerpoq, atom-ip nukinga
atorlugu nukissiorfiliornissaminik USA-mit
tapersersorneqarluni ikiorneqartussaanngorami.
Taamatut paasisutissiivoq Libyen-imi
nutaarsiassaqartitsivik pisortatigoortoq.
Oberst Gaddafi 80-kkunni nunarsuatsinni nunani arlalinni mumisitsiniatut peqqarniisaarniartartunullu tapersersuisutut tusaamasaavoq Italiami sakkutooqatigiinnut aappaluttunik atilinnut kiisalu Japan-imi sakkutuut imminnut aappaluttunik aamma taagortunut Tyskland-imilu, peqqarnissaarnianut soorlu palæstinamiut kangiani qiterlermi peqqarniisaarniartarnerannut tapersersuisutut ilisimaneqarluni. Araber-it angalaannartut Beduinit tupersuaniit immap killiganiittumi præsident-itut najukkaminiit politikerit ikinngutigisani kiisalu aviisiliortut kitaanersut araberitut nuimasutut pisoorsuartut pissuseqarfigalugit tikilluaqqusarpai.
Tikeraaminut assuarnarsinnaasarlunilu inuuvoq aallaamasoq aammalu illartitserujussuarsinnaasartoq.
Tikeraartimi akornanniikkaangami immikkut mersukkamik annoraarsuaqartarpoq afrika sinnerlugu
Naqqisimaneqannginnissaq taamatut nittarsaanniartarlugu.
USA-mik attaveqarnerit niueqatigeeqqilernerillu aallarteqqinneqarput. Libyen-imilu atorfillit nuimasut ullumikkut nutaarsiassaqartitsivimmut oqaatigaat, USA-p atom-ip nukinga atorlugu nukissiorfiliornissamik isumaqatigiissut atsiugajaleraa, isumaqatigiissutissamilu Washington-i atom-ip nukinganik nukissiorfiliornissami ikiuunniartoq, teknik-ikkullu suleqatigiinnissamik Libyen-miullu teknikeriisa ilinniartinneqarnissaat aamma ilanngullugu isumaqatigiissusiorfigineqassasut, tamannali qanoq paasineqassanersoq erseqqissarneqanngilaq.
USA-mi qaffasissumik atorfillit ilaat aterminik taasaqarumanngittoq oqarpoq; Libyen-miut suleqatigiinnissamik isumaqatigiissummut isumalluarpallaannguatsiartut, qularutissaanngitsorli tassaavoq, Oberst, Gaddafi, maannakkut peqqarniisaarnianut aningaasalersuisartutut taaneqarsinnaajunnaarsimasoq, naalagaaffiulli qullersaatut akuerisaasutut USA-,mit isigineqalersimasoq, uuliap akiinik aningaasivia ulikkaartoq.