GA utaqqeqqissinnaajunnaarpoq
Inatsisartut ukiaanerani ataatsimiinneranni tamakku pillugit aalajangiiffigisassaat Nunatta siunissaanut pingaaruteqarluinnartut GAp pisortaa oqarpoq.
- Inatsisit toqqammaviusussat qulakkeertariaqarpavut. Allatut periarfissaqanngilagut, taamaammat sukumiisumik tamanna sulissutigineqartariaqarpoq. Maanna qinnuteqartoqarpoq, aalajangiinissarlu kinguarteqattaaginnarsinnaanngilarput, iliuuseqartariaqarlutalu, GA-p pisortaa Brian Buus Pedersen KNR-imut oqarpoq.
Aatsitassarsioqatigiit uuliasiortitseqatigiillu sulisuisa akissarsiassaat pillugit Inatsisartut ukiaq manna ataatsimiinnerminni aalajangiiffigisussaavaat, soorlu aamma Nunatsinni aatsitassap suulluunniit piiarneqarsinnaatitaasup uranimik akuata 0,1 procentimik qaffasinnerpaafffilerneqassanersoq aalajangiiffigineqartussaasoq.
Aatsitassanut ikummatissanullu inatsisip allannguuteqarnissaanut siunnersuut Inatsisartut oqaluuserisussaavaat.
Brian Buus Pedersen naapertorlugu aalajangiiffigisassat tamakku pingaaruteqartorujussuupput, pisuussutillu uumaatsut pillugit najoqqutassanik innuttaasut suliffeqarfiillu nunatta avataaneersut pisariaqartitsisut aamma oqaatigalugu.
- Suliniutini angisuuni illuliortiternernik sanaartornernillu suliassat pillugit inatsisissatut siunnersuut aamma aatsitassanut ikummatissanullu inatsit matumani eqqarsaatigaakka. Aalajangissat pingaarutillit taakku suliarilluagaasariaqarput. Inuiaqatigiinnut iluaqutaassaaq, suliffeqarfissuarnullumi aamma, GA-p pisortaa oqarpoq.
Aatsitassalerinermi uuliasiornermilu sulisut nunatsinneersut sapinngisamik sulisorineqarnissaat Brian Buus Pedersenip kissaatigaa, sulisorineqartussallu nunanit allaneersut akissarsiatigut unammillerfigineqarsinnaanissaat taassuma kissaatigaa.
- Sulisut nunatsinneersut akissarsiassaat nunanit allaneersunut naleqqiullugit marloriaataat sinnerlugit amerlanerussapput, taannaannaanngitsorli, kisianni suliffeqarfiit nunatsinneersut sapinngisamik aamma isumaqatigiissusiorfigineqarnissaat aamma pingaaruteqartorujussuuvoq, Sulisitsisut Peqatigiiffiata pisortaa Brian Buus Pedersen KNR-imut oqarpoq.
Brian Buus Pedersen suliffeqarfiit Katuami isumasioqatigiissinneqarneranni "Inerik 2012"-imi maanna peqataavoq. Pisuussutit uumaatsut pillugit suliffeqarfiit nunatsinneersut iluaquteqarnerusinnaanissaat pillugu taama isumasioqatigiittoqarpoq.
