GA: Tamakkiisumik ilumoortuunngilaq
Sanaartornissalli pingasuusut piareersarlugit suliarineqarnerisa ingerlanneqarsimanerat GA-p iluarinngilaa Jens B. Frederiksenilu toqqaannartumik isornartorsiorlugu, taanna ippassigami tusagassiorfinnut nalunaarummi oqaatigimmagu ilungersornermigut kvadratmeterimut aki 20.000 koruuniniit 17.000 koruuninut appartissimallugu.
Tamannalumi ilumoorpoq, GA tusagassiorfinnut nalunaarummi allappoq.
- Oqaatigineqassaarli sanaartornermik suliniutit assigiinngilluinnartut marluk Jens B. Frederiksenip imminnut naleqqiummagit. Taamaammat isumaqarpugut Ineqarnermut Naalakkersuisoq kusassaasoq, GA allappoq.
Sulisitsisut peqatigiiffiat naapertorlugu suliniutinik allanngortitsinerit annertuut ingerlanneqarsimapput, tamannalu atortussanut aningaasartuutinut malunnaatilimmik annikillisaataasimallutik.
GA-p suliap ingerlarnga quianaannartutut oqaatigaa.
- Jens B. Frederiksenip suliariumannittussarsiuussinernut unitsiinnarneqartunut, neqeroortitseriaatsinut allanngortinneqarsimasunut suliniutinillu allanngortitsinernut aningaasartuutit nammineq pisuussuteqarfigisimasani ilanngukkunigit, suliummillu allanngortitsinermi akikillisaataasut ilanngaatigalugit, taava naleqqiussineq tulluarnerussagaluarpoq, GA tusagassiutinut nalunaarummi allappoq.
Taamatulli pisoqarnavianngitsoq GA-mit oqaatigineqarpoq, tassanngaanniillu neriuutigineqarpoq Naalakkersuisut sanaartortitsisutut suliaq manna ilinniarfigisimassagaat, siunissami neqeroortitsinerit erseqqissuunngitsut pinngitsoortikkumallugit, sanaartortullu piffissaajannginnissaat kiisalu inissiat pisariaqartinneqaqisut kinguarsarneqannginnissaat siunertaralugu.