GA Sisimiut: Nuummi umiarsualivissaq Nunatsinnut aningaasartuutaangaatsiassaaq

- Sisimiuni umiarsualiviup, 100 meterisut annertussusillip sanaartorneqarnerani, 56 millionit koruuniinnaat atorlugit naammassineqarnera eqqarsaatigalugu, eqqumiigaarput Nuummi umiarsualivissap, 300 meterisut annertussuseqartussap sanaartorneqarnissa, 800 millionit koruuninik sinnerlugit akeqartussaammat.

Lars Møller-Sørensenip naatsorsuinera naapertorlugu, Sisimiuni umiarsualiviup 56 millionit koruuniinnarnik akeqarnera eqqarsaatigalugu, Nuummi umiarsualivissaq 800 millionit koruuninik akeqarniaruni, 13-neriaammik anginerussaaq.

- Umiarsualivik Sisimiuni 100 meterisut takitigisoq, 56 millionit koruuniinnarnik akeqarpat, Nuummi umiarsualivissaq 300 meterisut takitigisoq annerpaamik, 200 millionit koruuninik akeqassagaluarpoq, Lars Møller-Sørensen oqarpoq.

Sisimiuni umiarsualiviup allineqarnissaanut, Qeqqata Kommunia nammineerluni aningasanik ujarlersimavoq.

Nuummi umiarsualivissaq allarpassuarnut atorneqartussaavoq, soorlu ilaatigut takornariaqarnerup ineriartortinneqarnissaanut iluaqutaasussanngorlugu sananeqartussaalluni.

Sisimiuni sulisitsisut peqatigiiffiata siulittaasua, Lars Møller-Sørensen isumaqarpoq, aningaasat taama amerlatigisut Nuummi umiarsualivissamut atorneqartariaqanngikkaluartut. Tassami taassuma naatsorsueriaasia naapertorlugu, Nuummi umaiarsualivissaq Sisimiunut naleqqiullugu 600 millionit koruunit angullugit aningaarsartuutaanerusussaavoq.

- Tamannalu ingasappallaaqaaq, Kalaallit Nunaanni Sulisitsisut peqatigiiffiata, Sisimiuni immikkoortortaqarfiani siulittaasoq, Lars Møller-Sørensen taama isumaqarpoq.

Nuummi umiarsualivissap sanaartorneqarnera, naammassippallu taassuma ingerlanneqarneranut, 715 millionit koruunit angullugit aningaasartuutaasussaasut naatsorsuutigineqarpoq, taamaammalu tamanna inuiaqatigiinnut sanaartornermillu suliaqartunut artukkiisussaassasoq, Lars Møller-Sørensen isumaqarpoq.

Royal Arctic Line kisiartaalluni umiarsuarnik umiarsualivimmi taleqqasarnermut akiliuteqartartussaavoq, taamaattumillu Nuummi umiarsualivissaq inuiaqatigiinnit toqqaannanngikkaluamik akileeqataasussaassallutik.

Umiarsualivissap taaguutillip, Sikuki Nuuk Harbour A/S-ip pisortaa, Jesper Johannesen Radioaviisimit oqaaseqartinniarsimagaluarparput iluatsinnaguli.