GA-p uparuaanera mamaagaa

Kalaallit Nunaanni Sulisitsisut Peqatigiiffiata GA-p SIK-mik maajip aallaaqqaataasiornermi oqaaserisaannut atatillugu akillutik uparuaanerat, Sulinermik Inuussutissarsiuteqartut Kattuffiani SIK-mi siulittaasup Jess G. Berthelsenip assut naammaginngilaa.

-Isumaqarpunga SIK-mik pasilliinerat mamaatsoq. Aningaasaateqarfinnut aningaasaliissutit tamarmik allaffissornermut atorneqarneq ajorput. GA-p sulisitsisutut aningaasaateqarfinnut akiliinnginniaannarluni allaffissornermut atorneraassanngilaq, Jess G. Berthelsen oqarpoq.

Qaammarsaanermut Ilinniartitaanermullu Aningaasaateqarfimmit SIK taperneqartarpoq, taakkulu aningaasat sinerissami qaammarsaanernut atorneqartarput. Naatsorsuutillu tamarmik oqartussanit akuerineqartarput.

Jess G. Berthelsenip aamma ilumoornerarpaa, ilasortamik aningaasarsiai pillugit isumaqatigiinniarnerit aallartinnerannit minutsit arfineq-marluk qaangiutiinnartut isumaqatigiinniarnerit kipitillugit SIK-p isumaqatigiinniartitaat nikuissimasut.

-Sulisitsisut Kattuffiat aningaasaateqarfimmut tamanut iluaqutissamik suliniartuartumut atatillugu taama soqutigittaatsigisoq piffissaajaatiginiannginnatsigu. GA-mmi ilaasortaasa aningaasaateqarfik taanna iluaqutigisarpaat, SIK-p siulittaasua naggasiivoq.