GA: Inuit illoqarfinnut nuullik inuussutissarsiutillu nutaat pilersillik

Inassutit malinneqarpata nunaqarfiit taartumik siunissaqassagaluartut kisianni Saqqarmiut akiuupput.

Royal Greenland, Royal Arctic Line aamma Nuuk Imeq Nunatsinni namminersorlutik inuussutissarsiortunut ilaapput. Nunatsinni suliffillit affaat sinnilaarlugit Namminersorlutik inuussutissarsiortuni sulipput, sinneri kommunit allaffiini, napparsimmavinni atuarfinnilu - aamma pisortat suliffeqarfiutaannik taaneqartartuni - sulillutik

Nunani avannarlerni allani sulisut pingassuugaangata marluk namminersorlutik inuussutissarsiortuni sulisarput, pisortat suliffeqarfiutaanni sulisut pingajoqarterutaannaallutik. Nunatsinnilu pisortat suliffeqarfiutaasa sulisoqarnerujussuat, aningaasarsiornikkut namminersulernissamut aporfiusoq, GA-p aningaasarsiorneq pillugu nalunaarusiaata takutippaa. Nalunaarusiallu assigiinngitsorpassuartigut namminersortunngorsaanissaq soorlu inassutigigaa.

- Kalaallit Nunaata namminersortunngorsarnissaa uani pineqanngilaq. Inuiaqatigiinniuna sulisoqarnerulernissaa pineqartoq, inuiaqatigiit tamarmik isertittagaat amerlisinniarlugit. Namminersorlutillu suliffiutillit amerlippata inuiaqatigit ineriartornerat sukkanerulissasoq upperaarput, Henrik Leth oqarpoq.

Nunaqarfiit aamma pisortat aningaasaataannik atuilluartarput, aalisarluni piniarlunilu inuussutissarsiornermut tapiissutitigut, aammali assersuutigalugu atuarfeqarnikkut peqqinnissaqarfiullu nunaqarfinni sulisoqarneratigut.

Kisianni Saqqami nunaqarfimmi aqutsisunut ilaasortaq Ole Zeeb isumalluarpoq:

- Saqqaq aalisarluni inuussutissarsiorfigissallugu periarfissagissaarpoq. Taavalu aamma aasaq naallugu takornariaqartarluni. Kiisalu neqissaqarniarneq eqqarsaatigigaanni timitsinni tuttut periarfissaalluarput, Ole Zeeb oqarpoq.

Henrik Lethillumi nassuerutigaa, nunatta aningaasarsiornikkut namminersulivinnissaa anguniaraanni, nunaqarfiit tamarmik matunissaat pisariaqanngitsoq. Kisianni nunatta karsianut annerusumik akileeqataasariaqartut aalajangiusimavaa.

- Ingammik avannaani ingerlalluartumik qaleralinnik tunisassiortoqarpoq. Taamaattumik aningaasarsiornikkut siuariartornissatsinnut aqqutissat ataasiinnaanngillat. Kisianni suliffinnik, nalilinnik pilersitsisinnasunik, pilersitsisoqartariaqarpoq, Henrik Leth oqarpoq.

"Namminersortuuneq - suliassarujussuaq, ajornanngilarli"

GA-p nalunaarusiarititaa ullumi saqqummerpoq.