GA: Inatsisartut inuussutissarsiornermut politikkeqarnertik sukatertariaqarpaat
Kalaallit nunaanni sulisitsisut peqatigiiffianni pisortaq Henerik Leth isumaqarpoq, inuussutissarsiornermi sinaakkutassiuinissaq Inatsisartut eqqumaffigisariaqaraat.
- Aalisarneq pillugu inatsit, aamma upernaakkut ataatsimiinermi sammineqartussaq, assersuutigisinnaavarput. Taassuminnga aqutsineq ima qasungatigaaq, allaat avannaani tunitsiviliisoqarnikuulluni pisariaqartinneqanngitsumik arlaatigulluunniit pissutissaqanngitsumik immaqa arlaata arlaannik ilisiarisimaqarneranik, Henerik Leth oqarpoq.
Henrik Leth-ip aamma assersuutigaa, saarullinniutinik kilisaataatilit 80-ikkut naalernerannnili aalisarnissamut akuersissuteqartut akuersissumminnik arsaarneqariataarsimasut.
- Tassa Aalisarneq pillugu inatsit qasungavallaamik aqunneqarsimavoq, maannalu syukannernerusumik aqutsinissaq pisariaqalersoraara, Sulisitsisut Peqatigiiffiata, GA-p pisortaa, Henrik Leth oqarpoq.
Tassa Nunatta nunarsuup sinnrani aningaasaliisussarsioruttulernermini tutsuiginassutsi annaariannaavaa, tamannalu naammaginanngilaq, Henrik Leth nangippoq:
- Sinaakkutassanik inatsisiliornikkut Naakallersuisut namminneq aalajangiinissamut periarfissaqarnerutarput, aammani eqaannerusumik aqutsinissamut periarfissiigaluarput, kisianni eqaannerusumik periarfissaqarneq inatsimmi siunertaasut sanioqqullugit soqutigisat allat aallunneqaleraangata, periarfissiineq eqaappallaalersimassaaq, GA-p pisortaa oqarpoq.
Henrik Leth neriuppoq, aalisarneq pillugu ataatsimiisitaliarsuup inassutai inatsisartuni ilaasortat tusaaniassagaat.
- Aamma neriuppunga, aalisarneq pillugu maanna inatsisaasumut allannguutaasussanik siunnersuusiussasut, aalisartut taamaalillutik naapertuunnerusunik sinaakkutaqarniassammata. Taamaalilluta aamma sangusajaartumik politikkeqarneq inuiaqatigiillu pisuussutaannik taamungaannaq ingerlatsineq, ullumi isiginnaagarput siunissami qaangerniassagatsigu, Henrik Leth oqarpoq.
