GA: Ilinniartitaanermut aningaasaliissutit toqqammaveqartariaqarput

Ilinniartitaanermut annertuumik aningaasalersuisoqarnialernera nunatsinni sulisitsisut peqatigiiffiinit kattuffiinillu iluarisimaarneqarpoq. Nunaqavissut sulisitsisut kattuffiat NUSUKA isumaqarpoq aningaasaliigaanni ilinniartitaanerup isikkua pillugu misissueqqissaartoqartariaqartoq. Sulisitsisut Peqatigiiffiat alla, tassa Grønlands Arbejdsgiverforening tamatumunnga isumaqataavoq. Aningaasarpassuarnik atugassiineq tunngavissaqarluartariaqartoq GA sinnerlugu Hagen Højer Christensen oqarpoq:

- Naalakkersuisut ilinniartitaanermut pitsanngorsaarusunnerat GA-mit iluarisimaarparput, sorpiaalli aningaasaliiffigineqarnissaannut toqqammavissanik amigaateqarluta, sorpiaanuku aningaasaliiffiginiarigut qanorlu ililluta aningaasalersuiniarpugut? Hagen Højer Christensen aperaaq. Ilinniartitaanermut aningaasaliinissaq tunngavissaqarluassappat misissuisoqartariaqartoq GA aamma isumaqarpoq.

- Meeqqat atuarfianniit anisussat marloriaataasussaapput, taamaattumik ilinniartut inissaannik sanaartortitsinissamut aningaasaliissutissat amerlanerusariaqartut, Hagen Højer Christensen oqarpoq.