GA ILIK-mit ilalernartinneqarpoq

Nunatsinni Sulisitsisut Peqatigiiffiat -GA- sapaatip-akunnerata naanerani meeqqat atuarfiannik sakkortuumik uparuaavoq, oqarluni ilinnialersartut atuarnermut kisitsinermullu pikkorinnerusuugunik ilinniarfiusinnaasut amerlanerit pilersinneqarsinnaagaluartut. Uparuaanerat Sulisitsisut Peqatigiiffiannit ILIK-mit ilalernartinneqarpoq. Kattuffik isumaqarpoq ilinnialersartut ilinniarsinnaaneq ilikkartariaqaraat ilinniagartillu naammassillugu.

-Tamakkiisumik naliliineq isumaqatigaarput, massakkummi nalilersoqqittariaqarpoq ilinniarnermut politikki qanoq ingerlassanersoq. Soorlu kalaalinngorsaaneq eqqarsaatigalugu ilinniakkat, atuakkallu assigiinngitsut tamakkiisumik kalaallisut ingerlanneqartarnerat isummerfigeqqinnissaat pisariaqartutut isikkoqarpoq, ILIK-mi pisortaq Steffen Ulrich-Lynge oqarpoq.

Assersuutigalugu matematik, fysikkilu kalaallisut ingerlanneqartartut ullumikkut kalaallisut ingerlanneqaannassanersut eqqarsaatigineqarnissaat ILIK-mit kissaatigineqarpoq. Soorlu tuluttut qallunaatulluunniit atuartitsissutigineqarnissaat eqqarsaatigalugit.

ILIK-mi pisortaq isumaqarpoq, inuusuttut amerlanerit ilinniarusulissappata ajornartorsiutit marlunnik annertuunik qaangerneqartariaqartut.

-Iliuusissat annertuut arlaliupput. Atuarfinni ajornartorsiutit ilagaat ilinniartitsisut takkutinngitsoortarneri, saniatigullu inuiaqatigiinni ajornartorsiutit tamakkiisumik isigalugit annertuut. Taakku annertuumik suliaqarfigineqartariaqarput, inuusuttullu ilinniaqqinnissaannut annertuumik sunniuteqartussaapput, Steffen Ulrich-Lynge oqarpoq.

ILIK sulisitsisut 100-t sinneqartut ilaasortaaffigaat, amerlanerit namminersortuusut.