GA: - Arne Villumsenip soraarsinneqarnera isumakulunnarpoq
- Ilinniarfiup pisortaata piginnaasai Kalaallit Nunaanni ineriartornermut pingaaruteqartorujussuupput, taamaattumik ilinniarfimmi pisortatut soraarsinneqarnera tusarlugu tupaallannarpoq isumakulunnarlunilu.
Issittumi ingeniørinngorniartut ilinniarfianni, Center for Arktisk Teknologimi pisortap, Arne Willumsenip pisortatut suliunnaarneranik nalunaaruteqartoqarnerata kingorna, aviisillu inginiørip nittartagaani allaaserineqareersorlu, GA´p pisortaa qisuariaateqarluni taama allappoq.
Center for Arktisk Teknologimi kinguaariit nikinnissaat pillugu Arne Villumsen suliunnaartoq ilinniarfimmit nalunaarutigineqarpoq.
- Professor Arne Villumsen Kalaallit Nunaanni ilisarisimaneqarlualersimavoq, taamaattumik takorloorsinnaasimanngilarput suliffianit ingerlaannaq suliunnaarsinneqarnissaa, Henrik Leth oqarpoq.
Kalaallit Nunaannut angisuumik pingaaruteqartut pineqartillugit ammasumik oqaloqatigiittoqartarnissaa pingaaruteqartoq, Henrik Leth isumaqarpoq.
- Ullluinnarni inuunitsinnut siunissamilu pisussanut angisuumik sunniuteqartut aalajangerniarneqartillugit apereqqaarata aalajangiisoqartarnera Kalaallit Nunaanni qatsulluinnarparput, Henrik Leth oqarpoq.
Ilinniarfiup siunissami pilersaarutai tutsuiginartumik paasissutissiissutigineqarnissaat, Henrik Lethip ilinniarfimmut kaammaattuutigaa.