GA: Aningaasanut inatsisissaq ernumanarpoq
Nunatta karsiata amigartooruteqarluni politikkikkut ingerlanneqarnissaa, Aningaasaqarnermut Naalakkersuisup ersissutiginngilaa, soorlu Siumukkut qanga siuttuullutik Naalakkersuisuusarnerisa nalaani taamaattoqartartoq.
Nunatta karsia 2014-imi amma 15-imi amigartooruteqarluni ingerlanneqassaaq, 2016-imili 17-imilu tamanna illuanut saanitsinneqassalluni, tassa ukiut marluinnaat ingerlaneranni sinneqartooruteqarnissaq siunniunneqarluni.
Taamanikkussamut sinneqartoorutissanut toqqammaviliissapput, akileraarutinit akitsuutinillu qaffaanikkut aamma inissiat tuniniarneqarnerisigut sanaartortitsinermullu aningaasartuutit affaannanngortinnerisigut tamanna ilaatigut pissalluni.
Taama ittumik politikkeqarnissaq Sulisitsisut Kattuffiata pisortaata, Brian Buus Pedersenip ernumanartoqartippaa.
- Nunatta siunissami aningaasaqarniarnera eqqarsaatigalugu ernumanartorsiorfimmiilersutut uagut isigaarput. Ulluinnarni inuunerput appariartissanngikkutsigu aningaasrsiutissanik nutaanik nassaarsiortoqartariaqarpoq, tamannalu pilertortumik pisariaqarluni.
Brian Buus Pedersen taama naliliivoq. Taassuma aamma annilaanngatigaa, Nunatta karsiata amigaartooruteqarnera annertusiartuinnavissoq atorniarnernik nutaanik matussuserniarneqarmat.
- Aningaasaqarnermut inatsisissami takusinnaanngilarput amigartoorutit qanoq matussuserniarneqarnersut, tassalu tamanna annilaaganartoq, Brian Buus Pedersen oqarpoq imalu nangilluni.
- Maanna amigartooruteqarneq ukiualunnguit qaangiuppata matuneqassasumik oqalunneq mianersugaalliorneruvoq, tassami 2016-imi 17-imilu amigartoorutit matussuserneqassappata aningaasaqarnermut politikkikkut annertuumik piumasaqartoqartariaqassaaq, Brian Buus Pedersen oqarpoq.
Aningaasanut inatsisissap siunnersuutigineqarnera qimerlooreerlugu, Brian Buus Pedersenip ajuusaarutigaa, matussusiinermi akileraarutit akitsuutillu atorlugit amigartoorutinik matussusiisoqarnissaa siunertarianeqarmat.
- Nunatta karsia imaarutilermat taassuma immeqqinniarneratigut nutaanik nassaarsiorpasittoqarpoq, soorlu suliunnaarnersiutit akileraarusernerisigut, raajanut akitsuutip qaffaneratigut allalu pisariaqartinneqartunik akitsuusiinertigut, tamaattumik oqartoqarsinnaavoq aningaasakilliorneq matussuserniarlugu akileraarutit akitsuutillu qaffanniarneqrput.
Sulisitsisut Peqatigiiffianni, GA-mi pisortaq Brian Buus Pedersen taama oqarpoq.
