GA: - ACU-p inuiaqatigiit sallunaveeqqutitut tigusarai
- Inuiaqatigiinnik sallunaveeqqutitut tigusinertut assersuussinnaavarput, Sulisitsisut Peqatigiiffianni pisortaq, Henrik Leth, suliumajunnaarniarnermut tunngatillugu tusagassiutinut allappoq.
Henrik Lethip tikkuarpaa nunarsuaq tamakkerlugu timmisartuutileqatigiiffiit piffissami maanerpiaq ajornartorsiuteqaleruttortut, timmisartuutileqatigiiffinnilu sulisut aningaasarsiakinnerulernissaminnut piareersimaleruttortut, Air Greenlandimi saqisut Peqatigiiffiat, ACU, aningaasarsiaminnik annertuumik qaffaavigineqarnissartik piumasarilermassuk.
- Kalaallit Nunaanni timmisartuussisarnerni unammilleqatigiinneq annikereeqisoq inuiaqatigiinnik eqquiniarnertut atornerlunneqarpoq, innuttaasummi angalaniarunik Air Greenland kisiat periarfissaraat, Henrik Leth oqarpoq.
Taanna aamma isumaqarpoq utoqqalinersiutit akileraarutillu pillugit naammagittaalliornerit allatut aaqqinneqarsinnaasut, taakkumi Air Greenlandimit nakkutigineqarsinnaanngimmata, akileraartarnermummi
oqartussaasut tassani aaqqiagiinngiffigineqarput, ajornartorsiutillu taakku allatut iluarsiivigisariaqarput.
- Akerleriinneq, ataqatigiinnermut aaqqissuussinermik unittoortitsisoq, tassaavoq Kalaallit Nunaata atorfissaqartinginnerpaasaa. Akerleriinneq pisariaqartinngilarput, Sulisitsisut Peqatigiiffianni pisortaq, Henrik Leth, ammasunik allakkamini naggasiivoq.
