GA: Aatsitassarsioqatigiit nalornisinneqassanngillat
- Siumut qinersinermi angusaqarluarneranut pilluaqquarput, qinersisartut ersarissumik oqariartuuteqarput, GA-p pisortaa Brian Buus Pedersen oqarpoq.
Inuussutissarsiutillit eqqissillutik sulisinnaanissaat, taassuma neriuutigaa:
- Aningaasarsiornerup pataajaatsumik aqunneqarnissaa, Sulisitsisut Peqatigiiffiata pingaartippaa, polikkikkullu piffissami takkuttussami aalajangigassat pingaarutillit pisariaqartullu pillugit partiit isumaqatigiillutik aalajangiisariaqassallutik, Brian Buus Pedersen oqarpoq.
Akileraaruseriaatsip Nunatsinni ullumi atuuttup allangortinneqannginnissaa Siumup qineqqusaarutigaa, soorlu aamma Demokraatit taama isumaqartut, GA-miillu tamanna iluarineqarpoq.
Suliniutinulli angisuunut inatsisip allanngortinneqarsinnaanissaanik Siumup qineqqusaarnermi oqariartuuteqaqattaarnera, Brian Buus Pedersenip GA sinnerlugu ernummatigaa, soorlu aamma aatsitassarsiornermi isumaqatigiissutit atsiorneqareersut isumaqatigiinniutigineqaqqinnissaannik , aatsitassarsioqatigiillu taamaalinikkut akileraarnerusalernisaannik Siumup siunniussaqarnera, GA-mit aamma ernummatigineqarpoq.
Tassa tamakku Brian Buus Pedersenip Nuummi qineqqusaarnerup nalaani isornartorsiugaasa ilaat, imatullu ilaatigut oqarluni:
- Piumasaqaatit sukannersut aatsitassarsioqatigiit tunuarsimaarfigineq ajorpaat, qanorli pisoqarniarnersoq nalornissutigisarlugu, Sulisitsisut peqatigiiffiata pisortaa, Brian Buus Pedersen, oqarpoq.
Aatsitassarsioqatigiit aatsitassanik Nunatsinni suliluunniit piialersimannginnerat eqqarsaatigalugu ingerlatsiviit isertitaminnit akileraarnerusalernissaannik, aatsitassallu annissorneqartut akitsuuserneqartalernissaannik, tassa royaltiesilersorneqarsimanissaannik, partiit piumasaqannginnerunissaanik, Brian Buus Pedersen neriuuteqarpoq.
