GA aamma SIK isummersorput

apriilip 13-at 2007 12:32

Naalakkersuisut Aningaasaqarnikkut ingerlatsineq pillugu nalunaarutaat inuiaqatigiinni pissanngatigineqartoq ullumi inatsisartunut saqqummiunneqalerpoq.

Nalunaarummi siunniunneqartut pillugit Sulisitsisut Kattuffianni GA-mi, sulianik ataqatigiissaarisumut Jens K. Lyberth-imut aammalu Sulisartut Kattuffianni SIK-mi siulittaasumut isummerfigitippavut.

SIK-p siulittaasua Jess G. Berthelsen ima aallarniivoq:

-Maannakkut ukiuni tulliuttuni sulisartut allatut ilinniarteqqinneqarnissaat ilaatigut anguniarneqarpoq, aamma inissiat , ineqarsinnaaneq inissianillu pisariinnerusumik aaqqissuussisinnaaneq tikinneqarpoq, ilaasortatsinnut annertuumik attuisussaq.

Mittarfeqarneq, ilaasortattalu nikerarsinnaanerat annertuumik eqqartorneqarpoq, tamakulu aningaasarpassuarnik naleqartussaapput, Jess G. Berthelsen oqarpoq, nagillunilu:

- Taavalu aamma sinerissamut qanittumi aalisarneq ilaasortatsinnut aamma pingaaruteqarluinnaqqissaartoq, tassami aalisarneq iluamik ingerlanngippat, nunami suliffissat aamma akunnalissammata, taamaattumik aamma taanna pingaaruteqarpoq, Jess G. Bertheslen oqarpoq.

Jens K. Lyberth, Sulisitsisut Kattuffianni sulianik ataqatigiissaarisoq, ima isummersorpoq:

- Tassa ataatsimut isigalugu oqaloqatigiinnissamut tunngavissaqarluarpugut;SIK-tulli isumaqarpugut, ilinniartitsinermut tunngasortaa pingaartorujussuartut isigaarput, suleqataaffigerusuttorujussuullugulu. Taassuma saniatigut suliffinnik pilersitsinissanut periarfissiinissaq, maani nunatsinnit avataaninngaaniillu aningaasaliinikkut pilersitsisinnaanerit; tamakku tapersersorluarpavut.

Jess G. Berthelsen oqarpoq, kivitseqatigiinnissamut piareersimallutik, maluginiarneqaqqusaalu tassaavoq, ilaatigut annertuumik oqariartuutigineqarmat, aalisarnerminngaaniit aatsitassarsiornerup tungaatigut ikaarsaarnissamut annertuumik piareersartariaqartugut, taanna isumaqatigaarput, kisianni aalisarneq normu 2-tut inissinniarneqassanngilaq, taanna mianersuutigillaqquvara, saarulliit takkutilerput, taamaattumillu aalisarnermut tunngasut annertoorujussuarmik sammileqqittussaavagut, taamaattumik pingaaruteqarpoq tamakku eqqummaariffiginissaat, Jess G. Berthelsen naggasiivoq.