GA aamma ammanerunissamik noqqaavoq

Pisortaqarfiup taassu Kalaallit Nunaat avammut  nittarsaatigiutigalugu, qinnuteqataatinik suliaqartarnera, akuersissuteqartarneralu ilutigitillugulu Aatsitassanut inatsit malinneqarnersoq pillugu nakkutiginnittuunera GA-miit isornartoqartinneqarpoq.

Suliassaqarfinnik akuliutsitsineq, tassami nunatsinni inuussutissarsiutit pingaarnersaannik ingerlatsinermi arlaannaannulluunnit attuumassuteqanngitsumik nakkutigineqangimmat GA-miit toqqissisimanartinneqanngilaq. Tassami aamma Aatsitassanut inatsit sinaakkutissatut sananeqarnikuummat qanorluunnit isumalersorneqarsinnaammat.

- Aammattaaq nangaanartotaqartitsineq matoqqasuunermik pissuteqartoq, Aatsitassanut Pisortaqarfiup aasaap ingerlanerani ersersittuagaa inuinnnaat oqartussaaqataanerannut tulluutinngilluinnartoq naqissuserneqartoq, GA-miit oqaatigineqarpoq.

Sulisitsisut Peqatigiiffiata aammattaaq naqissuserpaa, misilittakkat taamaattut pissutaaqataasimasut GA-p peqquserlunnernut pissaanermillu atornerluinermut suliniaqatigiiffimmik Transparency Internationalimik aallartitseqataaneranut.

Aatsitassanullu inatsit nutarterneqartariaqaraluartoq taamaalilluni sinaakkutit ersarinnerlernissat anguneqarsinnaammat, GA isumaqarpoq.

Suliassaqarfimmi kalaallit suliffeqarfiutaasa sulisuisalu salliutinneqarnissaat pillugu sukumiinerusumik nassuiaasersuisoqartariaqarpoq. Ajornaatsumik maalaartarfissanik pilersitsisoqartariaqarpoq, minnerunngitsumillu ingerlatsivimmik ammanerusumik pissusilersortoqartariaqarluni.

Ajoraluartumillli GA-p oqarneratut, Naalakkersuisut killormut ingerlatsipput. Aatsitassanik Pisortaqarfiup pisortaata, Inussutissarsiornermut Suliffeqarnermullu Naalakkersuisoqarfimmi qullersanngortinneqarneratigut killormut ingerlasoqannguatsiarpoq. Taamaalilluni Naaalakkersuinikkut ingerlatsineq kisimi pinnani aammattaaq inuussutissarsiornermut suliassaqarfik tamarmiusoq oqartussaassuseqarfimmut ataatsimut katersuunneqarpoq, GA taama nalunaaruteqarpoq.

Ilanngullugu GA-miit oqaatigineqarpoq, naak marloriarluni inuttassarsiorneqarsimagaluarluni nunami Naalakkersuisoqarfiit pingaaruteqarnersaasa ilaasa qitiusumik inissisimasussamik pisortassaminik atorfinitsitsisinnaannginnera ajortoqarneranik pissuteqarsimassasoq.

Sulisitsisut peqatigiiffiata tusagassiuutinut nalunaarutaata saqqummiunneqarnerata kinguninngua Naalakkersuisut akissuteqarlutik allagaqarput.

Aatsitassanut  naalakkersuisup Ove Karl Berthelsenip tusagassiuutinut nalunaarummi allagaqarnermini Aatsitassanut Ikummatissanullu Pisortaqarfiup matoqqasumik aqutseriaaseqarsimaneranik Sulisitsisut peqatigiiffiata GA-p pisortaata oqaatigisaa isumaqatiginngilluinnarpaa.

Ove Karl Berthelsenip erseqqissaatigaa Aatsitassiornerup avatangiisinut tunngasortaa mississorluarneqartoq.

Qinigaaffiup matuma ingerlanerani  aatsitasarsiornermi avatangiisinut suliassaqarfiup oqartussaasunit misissorluarneqarnissaa aallartinneqartoq Ove Karl Berthelsenip oqaatigaa.  Aatsitassanut ikummatissanullu inatsisip aammalu Kalaallit Nunaanni Danmarkimilu inatsisit aalajangersimasut naleqqussarneqarnissaat kiisalu naalagaaffimmut isumaqatiginninniaqqaarsimanissaq pisariaqartut Aatsitassanut naalakkersuisoq Ove Kar Berthelsen tusagassiuutinut allaqarluni erseqqissavoq.