G7-ip aningaasaqarnermut ministerii puisitussapput
Nunavummi inatsisartut ataatsimiittarfianni ataatsimiittoqassaaq. Inatsisartuni ilaasortat issiavii puisit amiinik qalequtaqarput, puisillu neqaanik sassaalliisoqassalluni.
Ministerit puisit amiinit aaqanngitsulianik aaqqatinillu tunissuteqarfigineqassapput, saqisullumi puisit amiinit sulianik qalersaqassallutik.
Aviisip The Globe and Mailip nittartagaani taama allaaserinnittoqarpoq.
EU-p puisinit tunisassianik EU-mut eqqusseqqusiunnaarniarneranut akerliuniarluni, puisit amiinik suliarpassuit Iqalunni ataatsimiinnermi saqqumilaartinneqassapput.
- Puisinniartarneq ersarittorujussuussaaq, neriuppugullu tamaani ataatsimiinnertik puigunaatsuutissagaat, siornatigummi taama avannarpasitsigisumiinnikuunngisaannarput, naggueqatigiillu Inuit inooriaasiat qanimut misigisaqarfigisimanagu, Nunavummi naalakkersuisut siulittaasuat Eva Aariak The Globe and Mailimut oqarpoq.
Nunat G7-it tassaapput nunat suliffissuaqarfiusut. Canadap, USA-p Japanillu saniatigut Tuluit Nunaat, Tyskland, Frankrig aamma Italia tassunga ilaasortaapput.
