G-44 aamma Malamuk aqagu kuultinnanniutissapput
Arsaannermik pissartanngorniunnermi Qeqertarsuarmi ingerlanneqartumi holdit sorliit aqagu medaljiannanniunnissaat ullumikkut paasinarsivoq.
Allattoq Elisa Isaksen
Aqagu pissartanngorniutivittussanngorput Malamuk Uummannameersut aamma G-44 Qeqertarsuarmeersut.
Bronzinnanniuttussat tassaallutik Eqaluk-54 Kujataani Tasiusameersut aamma SAK Sisimiuneersut.
Unamminerit taakku marluk KNR-imi radiukkut toqqaannartumik aqagu ualikkut aallakaatinneqassapput. Bronzinnanniunneq nalunaaqutaq ataatsiniit aallakaatinneqariarluni, kuultinnanniunneq pingasuniit aallakaatinneqassaaq.
Unamminerit taakkua aallakaatinneqartussaaneri pissutigalugit aqagu ualikkut radioaviisit siuartinneqassapput, tassa kalaallisut radioaviiseqassalluni nalunaaqutaq 14.45 qallunaatullu 14.50.