Føroya Banki piginneqataassuteqarnerpaanut 600 millioner koruuninik tunisilerpoq

marsip 15-at 2006 07:08

Savalimmiuni Føroya Banki marsip 21-iani ataatsimeersualeruni bankimut piginneqataassuteqarnerpaanut 600 millioni koruunit immikkut ittumik agguagarsiassatut tunniunniarpai. Aatsaat taama Savalimmiuni aktiaatileqatigiiffimmit aningaasanik amerlatigisunik tunniussisoqarniartoq, banki nalunaaruteqarpoq.

Savalimmiuni bankit marluk 1993-mi aningaasatigut ajornartorsiuteqalermata, Savalimmiuni naalakkersuisut Føroya Banki pilersippaat, bankit marluk kattutsillugit. Taamanimiillu banki ingerlalluartorujussuanngorluni.

Naalakkersuisut suliffeqarfiit arlallit pisortanit pigineqartut namminersortunngorsarnissaat sulissutigaat, taakkununnga ilaavoq Føroya Banki. Bankip tuniniarnera ajornannginnerussammat bankimi pisortat aalajangersimavaat piginneqataassuteqarnerpaat 600 millioni koruuninik tunineqassasut.

Savalimmiuni aningaasaqarnermut ministeri, Bárdur Nielsen savalimmiuni tusagassiorfinnut oqarpoq, aningaasat bankimit tunniunneqartut, pisortat akiitsuinut matussutaassasut.

Føroya Banki 2005-mi akileraarutit peeqqaarnagit 158 millioni koruuninik ukiumut naatsorsuutaat inerneqarput, 2004-mi 121 millioni koruuniusut.