Kikkuunersut takukkit: Futsalimik nunanut allanut unammisartut toqqarneqartut
Amerlanerit eqqaamassajunnarsivaat ukioq kingulleq Kalaallit Nunaat Danmarki futsalimik 5-4-mik ajorsartimmagu. Taamani tulluusimaarutigineqaqaaq.
Kalaallit qallunaallu unamminerat uani takuuk.
Manna Nunatta unammisartui takutitseqqinnissaminnut periarfissaqalerput. Tassami Nunat Avannarliit pissartanngorniuunnerannut Sverigimi novemberip 30-aniit decemberip pingajuat ilanngullugu pisussami peqataasussaapput.
Tassani kalaalli Norgimeersut, Sverigimeersut danskillu unammissavaat. Danmark, Sverige Norgilu nunarsuarmi futsalertartut pikkorinnerpaat allattorsimaffianni 61-imi, 63-imi 66-imilu inissisimapput. Allattorsimaffimmi tassani Kalaallit Nunaat ilaanngilaq.
Taamaammat pissartannguniuunnermi pisussami kalaallit unamminerni tamani ajugaanissamik siunertaqassanngillat.
- Suli ilinniarpugut. Ilikkartariaqarparput taama qaffasatsigisumi unammisartuuniaraanni suut piumasaqaataanersut, Kalaallit nunanut allanut unammisartuisa sungiusaasuat, Tekle Ghebrelul, KNR-imut oqarpoq.
- Arsartutta piumasaqaataasut paasisariaqarpaat. Sungiusangaatsiartariaqarput allaat ilaquttat ikinngutillu tunulliuttariaqarlugit. Amerlaqaat taamaattut taammaattorli ilaqarput illoqarfissiortarusunnerullutik peqataaniaratik nalunaartut, sungiusaasoq oqarpoq nagillunilu;
- Taamaammat suli ilikkagassanik ulikkaarpugut.
Kalaallit Nunaat Nordic Cuppimi ilaaleruni siullermeerluni pisortatigoortumik pissartanngorniuunnermi peqataassaaq. Qularutigineqassanngilarlu unammisartortagut tamaviaassasut pissartanngorniuunnerlu ilinniarfigissagaat.
Nunanut allanut unammeqataasussatut Rene Olsenimit Tekle Ghebrelulimillu toqqarneqarnikut kikkuuneri KNR-p pissarsiarai :
1 Loke Svane – måliniittoq – B-67
2 Malik Hermarij – måliniittoq B-67
3 Nathan Møller - Kagssagssuk
4 Maasi Maqe – B-67
5 Frederik Funch – B-67
6 John Ludvig Broberg – B-67
7 Ari Hermann – B-67
8 Malik Juhl – B-67
9 Markus Jensen – N-48
10 Niklas Thorleifsen B-67
11 Nick Reimer N-48
12 Anders H Petersen – B-67
13 Johan Bidstrup – B-67
14 Peter Leibhardt N-48
15 Katu Madsen (DK) B-93
16 Inuk Knudsen (DK) Lystrup Aarhus
