AWG 2018 Futsalertartut nunatsinneersut ajugaasaqattaartut
Futsalimik unamminerit illoqarfiit AWG-p ingerlanneqarfigisaata aappaani Hay Riverimi Diamond Jenness Secondary Schoolip timersortarfiani ingerlanneqarput, ukiorlu manna Arctic Winter Gameseqarnerani futsalimik unamminerit aallarnerlugit Kalaallit Nunaat aamma Yukon ataasinngornermi ullaakkut unammipput.
Kalaallit futsalimik unammisartuisa juniorit nukappiarartaat Yukonimiunut unammipput. Unammineq naligiiffiulluni 2-2-mik inerneqarpoq. Nunatsinnit isertitsisuupput William Gantzhorn aamma Niklas Kleist.
AAMMA ATUARUK AWG-mi ujammit siulliit qulakkeerneqartut
Futsalimi unammisartut nukappiaqqat nukarliit, juvernilet, ataasinngormat ualikkut aamma unammeqqaarput.
Alberta Northimeersut unammivaat, 5-1-imillu ajugaaffigalugit.
Unamminermi nunatsinnit isertitsisuusut tassaapput Nemo Thomsen marlunnik isertitsisoq, Malik Weiss, Aido Nielsen aamma Romeo Blidorf tamarmik immikkut ataatsimik isertitsillutik.
Unamminermi aappaani ajugaalluataavittut
Nukappiaqqat juniorit ataasinngornermi unnukkut aappassaanik unammipput. Tamatumuuna Nunavummiunut unammillutik.
Unamminermilu tassani nunatsinneersut nukappissat pisassaanngillat, Nunavummiummi 8-0-mik ajugaaffigaat.
Unamminermi isertitsisuupput Rene Thomsen aamma Nick Johansen, tamarmik immikkut marlunnik isertitsisut, Brian Bernhardsen, William Gantzhorn, Niklas Kleist aamma Niklas Johansen tamarmik immikkut målimik ataatsimik isertitsipput.
AAMMA ATUARUK Timersortartut Canadami sungiusaleruttorput
Nivissat ajugaalluataavittut
Futsalimik arsartartut nivissat nukarliit, juvernilet, Yukonimut ataasinngormat ullaap tungaani unammigamik ajugaalluataavissorput. Nivissammi nunatsinneersut Yukonimut unamminerminni 10-1-rujussuarmik ajugaapput.
Unamminermi isertitsinerpaasoq tassaavoq Asii Berthelsen. Taanna arfineq-pingasoriarluni isertitsivoq, Aili Platou aamma Karla Mørch tamarmik immikkut ataatsimik isertitsisut.
Nivissat juniorit aamma Yukonimeersut ataasinngormat unnukkut unammivaat.
Nunatsinneersut Yukonimiunut 4-1-imik ajugaapput, unamminermilu isertitsisuupput Emma Thomsen, Ungaaq Amondsen, Lis Eriksen aamma Laakki Mølgård.
AAMMA ATUARUK Kalaallit AWG-mut unammiartut tikereerput
Marlunngornermi unamminerit:
Nukappiaqqat juniorit, Kalaallit Nunaat-Alaska, Canadami nalunaaqutaq, malillugu nal. 15.00.
Niviarsiaqqat juniorit, Kalaallit Nunaat-Northwest Territories, Canadami nalunaaqutaq malillugu, nal. 16.00.
Nukappiaqqat nukarliit, juvenilet, Kalaallit Nunaat-Yukon, Canadami nalunaaqutaq malillugu, nal. 16.00.