AWG 2018 Futsalertartut ingerlalluarput

Nukappiaqqat juniorit illup iluani isikkamik arsaallutik Futsalimi ippassaq unnukkut unammimmata Kalaallit Nunaat Alaskalu 2-2-mik naligiipput. Alaskamiut kalaallillu unammiuaarnerni suli ajorsartitaanngillat, pissartanngorniutivinnissamullu arsaattartoqatigiit taakku anngunnissaat ilimanaateqarsinnaalluni.
Taakku Northwest Territories gruppeqatigivaat, Northwest Territoriesilu gruppimi pointikinnersaavoq. Alaskap Kalaallit Nunaatalu Northwest Territories aqagu unammisussaavaat. Northwest Territories marloriarluni maannamut unamminermini unamminerni taakkunani ajorsangaatsiarpoq.

Nukappiaqqat inuusunnerit juvenilemi unammisaqattaarnerminni aamma angusarissaarput. Yukonimummi ippassaq unnukkut unammimmata 10-3-mik ajugaapput. Kalaallit suli ajorsartinneqanngillat, gruppiminnilu siuttuullutik. Taakku Yamalimut, Tjukotkameersumut, sulilu aamma ajorsartinneqanngitsumut, ullumi unammisussaapput.

Kalaallit nivissat volleyballertartut Alberta Northimeersut ulloqeqqanut unammissavaat. Unammineq ajornakusoorsinnaavoq, Alberta Northimi marloriarluni unamminermini suli ajorsartinneqanngilaq gruppimilu siuttuulluni. Kalaallit marloriarlutik unamminerminni marloriarlutik ajorsarput, gruppimilu kingulliullutik.

Sulorarnermi nerrivimmilu arsaararnermi unamminissat ullumi aamma pissanganassapput, kalaallimmi taakkunani aamma peqataatitaqarput.

Kalaallit Nunaat Arctic Winter Gamesimi ujamminik maannamut 13-inik pissarsivoq - kuultit pingasut - sølvit arfinillit - bronzillu sisamat.