Futsal: Niklas Thorleifsen Champions Leaguemi unammeqataassaaq

24-nik ukiulik Niklas Thorleifsen futsalimi Danmarkimi pissartani unammeqataasarpoq. Danmarkimi taakku pissartaaginnanngillat. Aammali Champions Leaguemut anngupput januarimilu unammisassaat imaannaanngeqaat.

Champions Leaguemi unamminernut siullernut pingasunngornermi makitsisoqarpoq. Gentofte Futsalip unammisussanngorpai Sporting CP Portugalimeersut.

- Taakku futsalimi kakkannerpaanut ilaapput. TV-mi isiginnaareernikuuagut assorsuarlu kakkapput, Niklas Thorleifsen KNR-mut oqarpoq.

Sporting CP aamma Champions Leaguemi siuuttunut ilaalluinnarput. 2019-mi tassani ajugaapput ukiullu kingulliit arlallit final 4 angusarlugu.

Juullikkunni sungiusarneq

Champions Leaguemi unamminissani tullerni ajugaasut kisimik ingerlaqqittassapput. Taamaakkaluartoq kalaallimut peqataasussamut misigisaq pikkunassaaq.

- Unamminissamut assut qilanaarpugut pissangallutalu. Qularnanngitsumik unammineq ilikkagaqarfiussaqaaq, Niklas Thorleifsen oqarpoq.

Nuummut juullisioriassamaarpoq tassanilu kamiit timersuutit ateqattaassavai.

- Juulli tamaat sungiusaqattaassaqaagut. Qasujaassusera juullikkunni katannaversaartussaavara, Niklas Thorleifsen oqarpoq.

Unamminissaq suli ullulerneqanngilaq. Taamaattoq januarip aqqaneq aappaata 17-atalu akornanni pisussaavoq.