Futsal: Malik Hermarij uummallunneq pissutigalugu unammisartuujunnaarpoq
Futsalimi Kroatiami unammiuaarneq futsal week oktoberip aallartilaarnerani pisoq Malik Hermarijip nunanut allanut unammisartuni peqataanerisa kingullersaraat.
Aquttoq taanna 22-nik ukiulik ukiut malruk kingulliit Sverigami futsalimi akissarsiutigalugu unammisartuusoq ilimagisamit piaarnerusumik unammissaarpoq.
- Qaammatit marlussuit matuma siorna uummatikkut malugisaqartalerpunga. Sverigemi najugaqarnerani iluatsillugu nakorsamit misissorneqarpunga, Malik Hermarij KNR-mut oqarpoq.
- Ullualuit matuma siorna akissutisivunga oqarfigineqarlunga ajoqutiga uummatinniimmat allamik paasisaqarnissatta tungaanut arsaattartutut unammisartuunera piaarnerpaamik unitsittariaqariga, Malik Hermarij oqarpoq.
Nukappiararpassuit pilerigisagaat ukiut marlunngulersut matuma siorna piviusunngorpoq akissarsiutigalugu arsaattartuunissamut Athleti Futsal Klub pikkorinnerni unammisartut isumaqatigiissusiorfigigamigit.
AAMMA ATUARUK Futsal: Malik Hermarij Sverigemi futsalimi ingerlalluaqaaq
Siuariarsimaneralu oktoberimi Kroatiami unammiuaarnermi takuneqarsinnaavoq arlaleriaqaluni assiilluaqattaarami.
Allatut oqaatigalugu arsaattartutut unammisartuuneq pikkunassaqisoq aallartikkaluarpaa.
- Soorunami aalajangerneq artornarpoq maanna ukiuni marlunngulersuni akissarsiutigalugu unammisartuugama, Malik Hermarij oqarpoq.
- Aappaatigut piareersimaffigikannereerpara taamatut unittariaqarsinnaaneq. Allatut ajornartumik taamatut inissinnera akueriinnartariaqarpara, Malik Hermarij oqarpoq.
Maanna Nuummeeqqilereerpoq Sverigemut nuunnissaq sioqqullugu tassani najugaqarami.
- Imminut paarinissaq pingaarnerpaajuvoq. Ajoqutiga uummatinniimmat tassa piaarnerpaamik aalajangipallattariaqarnikuuvugut, Malik Hermarij oqarpoq.
Kalaallini siullersaalluni isumaqatigiissut tunngavigalugu Sverigemi unammisartunngorpoq tamatumalu kingorna kalaallit arlallit Sverigemut nuullutik futsalimi inerikkiartorput.
